Fakataha Hono 3 Kosilio Fakamatala 'Ea 'A e Pasifiki ^Featured

‘I he me’a fakaava ‘e he ‘Eiki Tokoni Palēmia ‘o Tonga Hon. Siaosi Sovaleni ‘a e Fakataha hono tolu ‘a e Kosilio ki he Fakamatala ’Ea ‘a e ngaahi fonua ‘o e Pasifiki na’a ne tapou ai ki he lahi ‘a e ngaahi pole ‘oku fehangahangai mo e tukuifonua ‘o e Pasifiki ‘o makatu’unga ‘i he ngaahi fakatamaki fakaenatula mo e feliuliuaki ‘a e ‘ea pea ‘oku ne uesia ‘a e malu mo e hao ‘a e nofo ‘a e kakai.

Ko e Fakataha ko’eni ‘e lele ia mei he ‘aho Monite 20 ki he 23 ‘a ia ‘oku nofo ‘a e fakamamafa ‘a e Fakataha ki he fiema’u ke tufaki ‘a e fakamatala ‘ea ‘i he taimi totonu mo hono tokangaekina ‘a ‘ene fekau’aki moe kakai ‘o e ngaahi fonua memipa pea ke fakamalohi ‘a e fekau’aki ‘a e ngaahi fonua memipa pea tu’u fakataha ke tu’uaki ‘a e mahu’inga ‘o e kaveinga ni.

Na’e hā foki ‘i he me’a ‘a e Tokoni Palēmia Siaosi Sovaleni ‘a ‘ene fakahā ko e konga lahi ‘o e ngaahi fakatamaki ‘oku hoko he tukui fonua ‘o e Pasifiki ‘oku fekau’aki tonu ia mo e ‘ea mo natula ‘a ia koe peseti ‘e 76 ‘o e ngaahi fakatamaki kuo lipooti talu mei he 1950 ki he 2004 ‘oku fekau’aki tonu ia mo e saikolone pea hoko kiai ‘a e mofuike, tāfea mo e la’ala’ā.

Na’e ‘i ai foki moe tokanga makehe ‘a e Fakataha ki he Saikolone ko Pam ‘a ia na’e toki hoko ki Vanuatu ‘a ia koe fakatātā mahino ia ‘o e ngaahi uesia ‘oku malava ke hoko ki he ngaahi fonua memipa. ‘Oku mahino mai foki mei he Fakataha ni ‘a e malava ke toe fakalalahi ange ‘a e ngaahi fakatamaki ‘e fakatupu ‘e he feliuliuaki ‘a e ‘ea ‘i he kaha’u ‘a ia ‘oku fai e tokanga makehe kiai pea koe pole ia ki he malu mo e hao ‘a e ngaahi fonua memipa.

‘Oku ‘amanaki foki ke hoko atu ki he Fakataha ‘a e Hou’eiki Minisitā ‘i he ‘aho Falaite ko hono 24 ‘a ia ko e Falaite ia ko’eni. Na’e hoko atu foki ‘a e Tokoni Palēmia ki he’ene pehē ko e Fakataha ‘i he levolo faka Minisitā koha faingamalie lelei ia ki he fengāue’aki vāofi pea ke vahevahe ‘a e ngaahi taukei kae pehē ki he koloa ke fakalakalaka ai pe kimu’a ‘a e mateuteu ki ha hoko mai ha fakatamaki

‘Oku kau mai foki ki he Fakataha ni ‘a e kau Minisitā, Talēkita pe he ki he kau ‘Ofisa ma’olunga mei he ngaahi fonua ‘o e Pasifiki ‘o kau kiai ‘a Fiji, Cook Islands, Micronesia, Tahiti, Kiribati, Nauru, New Caledonia, New Zealand, Niue, Palau, PNG, Samoa, Solomon Islands, Tuvalu, Tonga, Vanuatu pea mo e Va’a Fakamatala ‘Ea ‘a ‘Amelika ki he Pasifiki ‘oku tu’u ‘i Hauai’i (United States National Weather Service Pacific Region Office, Hawai), SPREP mo e ngaahi kautaha hoa ngāue kehe.