Hoko 'a 'Elisapeti Langi koe fuofua Fakamaau Lahi fefine ^Featured

Ko hono fokotu’u ko’eni ‘o Langi na’e fili ia ‘e he pēnolo ‘a e Fakataha Tokoni ‘a ia ‘oku faka-fatongia ‘aki kinautolu hono fili ‘o e Hou’eiki Fakamaau ki he Ngaahi Fakamaau’anga ‘o Tonga.

‘Oku faka-hisitōlia ‘eni he koe toki fuofua hoko ‘eni ha fefine Tonga ke fokotu’u ki he lakanga Fakamaau Lahi ‘i he Fakamaau’anga Lahi ‘o Tonga.

Fakatatau ki he fakamatala mei he Fakamaau’anga ko hono fokotu’u ‘eni ‘o Langi kene hoko koe Fakamaau Lahi fakataimi ki ha mahina nai ‘e 6 pea kene nofo taha ki hono fakamaau’i ‘o kinautolu kuo faka’ilo ki hono ngāue’aki mo faka'aonga'i, tauhi mo fetuku holo ‘a e faito’o konatapu.

Ko e konga ‘eni ‘a e ngaahi fakalakalaka ‘a e Fakamaau’anga ‘i hono tau’i ‘o e faito’o konatapu ‘a ia koe taha ia ‘o e ngaahi fiema’u vivili ‘a e fonua.

Ko Elisapeti Lavakei'aho Makoni Langi na’e hoko koe Fakamaau Polisi Ma’olunga ‘i he Fakamaau’anga Polisi ‘i he ta’u 2018 pea ki mu’a ai na’a ne hoko ko e loea ‘i he Va’a Talatalaaki ‘a Kalauni (Crown Law).

'Oku 'amanaki ke kamata ngāue 'a Langi 'i he lakanga fo'ou ko'eni fakafuofua ki he kamata'anga 'o e mahina ko Sepitema.