Fakatotolo'i kau faiongoongo 'e toko 3 'a e Letiō mo e Televīsone Tonga Featured
19 Nōvema, 2019. Kuo ma’u foki ‘e he ongoongo ni ‘a e fakamatala hange koia kuo tuku mai ‘e he ongoongo ‘a e Letiō Nu’usila Fakavaha’a Pule’anga mo e Kaniva Tonga kuo tu’utu’uni ‘e he Palēmia ‘o Tonga Dr. Pohiva Tui’onetoa ke fakahoko hano fakatotolo’i ‘a e kau faiongoongo ‘e toko 3 ‘i he Komisoni Fakamafolalea ‘a Tonga.
‘Oku makatu’unga ‘a e tu’utu’uni ko eni mei he launga ‘a ‘Etuate Lavulavu fekau’aki mo e ongo faiongoongo ko Salamo Fulivai pehe kia Vilisoni Tu’iniua pea mo e pule ‘o e studio ‘a e Letiō mo e Televīsone Tonga Setita Tui’onetoa.
Ko e launga foki ‘eni fekau’aki mo e ongoongo na’e tuku mai ‘e he toko tolu ko’eni ‘o pehe na’e hanga ‘e Lavulavu ‘o mapule’i ‘a e kau memipa ‘o e Fale Alea kenau fili ‘a Dr. Pohiva Tui’onetoa mei he Paati ‘a e Kakai kene hoko ko e Palēmia ia ‘o e fonua ‘i he ngaahi mahina si’i kuo tau situ’a kiai.
Na’e toe pehe tokua ‘e he ongoongo ko’eni na’e fakahoko mai ‘e he Televīsone Tonga na’e feinga ‘a Lavulavu ke foaki ange kiate ia ‘a e lisi ‘o e ongo ‘api na’a ne fiema’u mei he Pule’anga ‘i he ta’u ‘e 99 ko e pale ma’ana ‘i he founga totongi fakafufū ki he’ene ngāue ko’eni na’e fakahoko.
Ko e ongo 'api ko'eni koe 'api 'oku tu'u 'i he hala tahi 'i Sopu 'o e Pule'anga 'a ia 'oku lolotonga nofo pe ai 'a 'Etuate Lavulavu mo hono hoa 'Akosita Lavulavu pehe ki he 'api 'o Lavulavu 'i Tofoa 'a ia na'e mole ki he pangikē pea kuo fakatau 'e he kau siaina.
‘Oku faka’ikai’i foki ‘eni ‘e Lavulavu neongo kuo ‘osi tuku mai foki ‘i he ongoongo mo e mītia fakasōsiale ‘a hono hikitepi ‘e he tokotaha na’e talanoa telefoni mo Lavulavu ‘a ‘ena talanoa pea na’e ‘asi katoa ai pe foki ‘a e lea ‘a Lavulavu ‘o ‘asi ai ‘a e ngaahi me’a ko’eni kuo ne tukuaki’i ‘aki ‘a e kau faiongoongo.
Na’e faka’ikai’i foki ‘eni ‘e Lavulavu pea na’a ne pehe na’e ‘enisinia’i ‘a ‘ena telefoni mo e tokotaha ko’eni kene hā ngali kovi ai.
Kaikehe ‘i he fakamatala ni kuo tu’utu’uni ‘e he Palēmia ki he Sea ‘o e Poate Komisoni Fakamafolalea ‘a Tonga ke fakahoko hano fakatotolo’i ‘o e toko tolu ko’eni he kuo fakahoko ‘a e launga mei he papulika.
Ko ‘Etuate Lavulavu na’e tuku ia ki tu’a mei he Fale Alea mo e Kapineti 'i he ta'u 2016 makatu’unga ‘i ha’ane mo’ua ‘i he Fakamaau’anga ki he totongi fakafūfū (bribery) lolotonga ‘a e fili Fale Alea ‘o e ta’u 2014.
