Kamata ngāue ‘a e ‘Amipasitoa fo’ou ‘a e Pule’anga Siapani ki Tonga HE. Mr. Yukio Numata Featured
HE. Mr. Yukio Numata
Nuku'alofa
8 Mē, 2015
Kuo kamata ngāue mai ki Tonga ni ‘a e ‘Amipasitoa fo’ou ‘a e Pule’anga Siapani ki Tonga Yukio Numata ‘i he uike ni ‘a ia koe ‘aho Pulelulu ia 6 ‘o Mē 2015.
Ko hono fetongi mai ‘eni ‘e Numata ‘a Dr. Kazuchika Hamuro hili ia ha ta’u ‘e ua ‘ena fakahoko fatongia mai ki Tonga ni. ‘Oku ‘ikai sola ‘a Numata ki he ngāue fakatipilometika he na’a ne ngāue pē ‘i he Potungāue ki Muli ‘a Siapani ka ‘i he tafa’aki ki he fetokoni’aki mo e ngaahi fonua muli.
Na’a ne hoko koe konisela ki Potukali ‘i he ta’u 1999 pea ‘i he ta’u 2011 na’a ne a’u ai ki he tu’unga koe Konisela Seniale ki Brazil. Na’e ako pe ‘a Numata ‘i he ‘Univesiti ‘o Tokyo ‘o ma’u ai hono BA ‘i he ako ki muli (Foreign Studies). Na’a ne kamata hū ai ‘o ngāue ‘i he Potungaue ki Muli ‘a Siapani talu mei he 1975.
‘Oku fakata’u ua foki hono fetongitongi mai ‘e he Pule’anga Siapani ‘a e Lakanga ni ki Tonga ni pea ko e ‘Amipasitoa ‘aki ‘eni hono 3 ‘a Siapani ki Tonga ni talu hono fokotou’u honau ‘ofisi faka ‘Amipasitoa ‘i Tonga ni ‘i he ta’u 2009.
