‘E toe Puli pē Motu Fo’ou Featured
Nuku'alofa,
28 'Epeleli, 2015
Kuo ma’u ‘a e fakamatala mei he tafa’aki sioloki ‘a e Potungāue Fonua, Savea & Ngaahi Koloa Fakaenatula ‘o fakapapau’i mai koe motu fo’ou ne tupu mei he puna ‘a e mo’unga afi ‘i he vaha’a ‘o Hunga Tonga mo Hunga Ha’apai ‘e vave ni pe ha’ane toe fakangalo hifo ‘i he ‘oseni moana.
Na’e fakahoko foki ‘a e folau mo e savea ki he motu ni ki mu’a atu hili ange ‘a e puna ‘a e mo’unga afi pea na’e toe fakahoko mo e folau kiai ‘i he ‘aho Tokonaki ko hono 25 ‘o ‘Epeleli ke muimui'i 'a e tu'unga 'oku 'i ai 'a e motu ni.
Na’e fakahoko foki hano faka’eke’eke ‘e he ongoongo ‘a e Letiō Tonga ‘a e ‘ofisa sioloki ‘a e Potungāue ko ‘Apai Moala pea na’a ne ai fakahā kuo ‘osi mahino mei hono sivi ‘a e efu mei he motu fo’ou ni ‘o mahino mai ‘oku malohi ‘ene fio mo e tahi pehē ki he masima. Na'e toe pehe foki 'e 'Apai koe faka’ilonga ia ‘oku tu’u lavea ngofua ke toe pulia hifo ‘i he ‘oseni.
‘Oku ‘ikai foki ko ’ene toki hoko ‘eni he na’e ‘i ai pē ‘a e motu pehe ni ne ‘asi pea toe puli pe foki ‘i he ngaahi ta’u kuo maliu atu. 'Oku kau foki 'a e motu fo'ou ni 'i hono manakoa pehe ki he lahi 'a hono ngaahi 'ata kuo 'ave holo 'i he kolope.
