Tolongi me’alele 'a e kau tufa tokoni afā Featured
23 Fepueli, 2018. ‘Oku ‘i ai ‘a e hoha’a ‘a e talēkita ‘o e NEMO Leveni ‘Aho ‘a ia ‘oku nau tokangaekina ‘a e fakatamaki fakaenatula ki he ngāue pango mo laulaunoa ‘a e kakai ‘e ni’ihi ‘o hange ko hono tolongi ‘a e taha ‘o e ngaahi me’alele tufa tokoni.
Na’e hoko ‘eni ‘i he pongipongi Pulelulu ‘o e uike ni ‘a ia na’e tolongi ‘a e me’alele ko’eni lolotonga ia ‘oku foki mai hili ‘a ‘ene kau atu ki he tufa ‘o e ngaahi tokoni.
Na’e pehe ‘e ‘Aho ‘oku fakahoko honau fatongia ‘ikai ha toe malōlō ke fakaa’u ‘a e tokoni ki he kakai ‘o e fonua pea ‘e ‘ikai ta’ofi ‘e he laulaunoa ko’eni ‘a ’enau ngāue he ‘oku fiema’u ‘e he kakai ‘a e tokoni.
‘I he fakamatala ‘a ‘Aho koe loli ko’eni na’e ‘ikai maaka pea ‘oku ‘ikai kenau fakapapau’i ‘a e taumu’a ‘o e tolo ko’eni.
‘Oku lahi foki mo e launga fekau’aki mo e tufa tokoni ka kuo tuku mai foki ‘a e fakamatala mei he NEMO ke fakatokanga’i ‘e he kakai ‘o e fonua ‘oku nau fai honau lelei taha ke maau ‘a e tufa pea ‘oku nau fakafalala ‘i he lipooti mo e savea ‘a e kau ‘ofisakolo.
‘I he taimi tatau ‘oku nau feinga ke fakapapau’i ‘oku a’u ‘a e taumu’a ‘a e ngaahi kautaha mo e ngaahi fonua tokoni ki he kakai ‘oku nau fiema’u pea ke maau mo tonu hono lipooti.
'Oku hoha’a foki ‘a e kau ngāue tokoni ki he fa’ahinga ‘ulungaanga ko’eni pehe ki he ni’ihi ‘oku nau ‘ave ‘a e ngaahi fakamatala hala fekau’aki mo e tokoni moe anga hono vahevahe.
