Lava Kakato Ouau Fakanofo ‘Eiki Nōpele Fielakepa ^Featured

Na’e fakahoko ‘a e lotu kamata ‘o e ouau ‘e Faifekau Tevita Latailakepa ‘a ia koe Faifekau pe ia ‘o e Siasi Uesiliana Tau’ataina ‘o Tonga ‘o Haveluloto kimu’a pea toki fakahoko ‘a hono lau ‘a e Tohi Fakanofo mei he Taloni ‘e Viela Tupou mei he ‘Ofisi ‘o e Palasi pea toki fakahoko ‘e Toka ‘i Fanga’uta ‘a e lea fakamālō ‘o e ouau ni.

Na’e me’a ‘i he ouau ni ‘a Pilinisi Ata, ‘Eiki Sālote Lupepau’u Taione, ‘Eiki Nōpele Vaea, ‘Eiki Tevita ‘Unga mo e Hou’eiki ‘o e fonua. Ko e taha’i ouau fakafiefia ‘eni pea na’e hā pe ia ‘i he fiefia ‘a e kāinga pehe ki he ngaahi kaungame’a mo e maheni ne nau matā tonu ‘a e ‘aho faka hisitolia ko’eni.

Ko hono fakanofo ko’eni ‘o Tongapo’uli Aleamotu’a ki he hingoa pea ‘e hoko leva ia koe Fielakepa ‘aki ia hono ono talu mei he Konisitūtone ‘oku nau hokohoko mai ‘i he hingoa Nōpele Tukufakaholo ni. Ko Tongapo’uli koe foha si’isi’i taha ia ‘o ‘Eiki Nōpele Fielakepa Longolongo'atumai mo Lady Tuna Kaimanu Fielakepa ‘a ia ‘oku kei laumalie lelei pe.

‘Oku kau ‘a e hingoa Fielakepa ‘i he Hou’eiki lalahi ‘o e fonua pea ‘oku kau foki ki he Ha’a Havea Lahi.  ‘Oku hā mahino pe foki ‘i he Konisitūtone ‘o e fonua ‘a e ngaahi tu’utu’uni mo e mafai ki hono fakanofo ‘o e ngaahi hingoa tukufakaholo pea ‘oku ‘A ‘Ene ‘Afio ‘a e mafai aofangatuku fekau’aki moia.

Ko e fakakakato ‘eni hono fakanofo ‘o e hingoa Nōpele Tulufakaholo ni hili ia ha Talāsiti mai ‘a Tongapo’uli Aleamotu’a ‘i he hingoa ni talu mei he ta’u 2013 hili ‘a e pekia hono ta’okete Lord Fielakepa.

Ko Tongapo’uli Aleamotu’a ‘oku ma’u uaifi ia kia Lupe Tu’itavake Aleamotu’a ‘o Kolomotu’a pe. ‘Oku lolotonga fakahokofatongia koe Pule Lahi ia ‘o e Kau Tau ‘a ‘Ene ‘Afio.

'Oku ha atu 'i lalo 'a e ngaahi 'imisi mei he Ouau Fakanofo.