Fakanofo Tongapo’uli Aleamotu’a Ki he Hingoa Nōpele Tukufakaholo Fielakepa Featured
Tongapo'uli Aleamotu'a
9 'Epeleli, 2015
Neongo ‘oku te’eki ke talaki faka’ofisiale ‘a hono teu fakanofo ‘o Tongapo’uli Aleamotu’a ki he Hingoa Nōpele tukufakahoko koe Fielakepa ka kuo ma’u ‘a e fakamatala falala’anga ‘oku ‘amanaki ke fakahoko ‘a e ouau ni ‘i he ‘aho Falaite ko hono 10 ‘o ‘Epeleli ki he ‘Api ko Mata’utuliki ‘i Kolomotu’a ‘a ia koe ‘aho Falaite ia ‘apongipongi.
‘Oku ma’u pe ‘a e fakamatala ko’eni mei he kakai ‘o Haveluloto pea ‘oku hā mai pe foki mei he’enau fakamatala ‘a ‘enau loto vekeveke mo fiefia ‘i he ‘amanaki fakanofo honau Nōpele. ‘Oku longolongo katoanga foki ‘a e kainga ni pea ‘oku ‘ikai puli ‘a ‘enau ‘ofa’i honau ‘eiki talu mei mu’a.
‘Oku hā foki ‘i he ongoongo ‘a e Tonga Daily News ‘a e fakahā kuo tuku mai mei he ‘ofisi ‘o e Lord Chamberlain meia Viela Tupou ‘a e fakaangaanga ke toki a’utaki mai ‘a e fakaikiiki ki he fakanofo ‘o Nōpele Fielakepa ‘a mui ange pea ‘oku makatu’unga ‘eni ‘i he pelepelengesi ‘a e kaveinga ni ki he fāmili.
Na’e talu hono fakanofo ‘o Tongapo’uli Aleamotu’a ke Talāsiti ‘i he Hingoa Nōpele Tukufakaholo Fielakepa ‘i he ta’u 2013 hili ange ia ‘a e pekia ‘a hono ta’okete Lord Fielakepa.
Ko hono fakanofo ko’eni ‘o Tongapo’uli Aleamotu’a ki he hingoa pea ‘e hoko leva ia koe Fielakepa ‘aki ia hono ono talu mei he Konisitūtone ‘oku nau hokohoko mai ‘i he hingoa Nōpele Tukufakaholo ni. Ko Tongapo’uli koe foha si’isi’i taha ia ‘o ‘Eiki Nōpele Fielakepa Longolongo'atumai mo Lady Tuna Kaimanu Fielakepa ‘a ia ‘oku kei laumalie lelei pe.
‘Oku kau foki ‘a e hingoa Fielakepa ‘i he Hou’eiki lalahi ‘o e fonua pea ‘oku kau foki ki he Ha’a Havea Lahi. ‘Oku hā mahino pe foki ‘i he Konisitūtone ‘o e fonua ‘a e ngaahi tu’utu’uni mo e mafai ki hono fakanofo ‘o e ngaahi hingoa tukufakaholo pea ‘oku ‘A ‘Ene ‘Afio ‘a e mafai aofangatuku fekau’aki moia.
Ko Tongapo’uli Aleamotu’a ‘oku lolotonga fakahokofatongia koe Pule Lahi ia ‘o e Kau Tau ‘a ‘Ene ‘Afio.
