Hopoki Tama Tu'i Tupou VI vaka fo'ou kainga 'Eua MV Maui Featured
Tama Tu'i Tupou VI 'i hono hopoki 'o e MV Maui
16 ‘Akosi, 2017. Na'e lava lelei 'a hono hopoki ‘e he Tama Tu’i Tupou VI ‘a e vaka 'o e kainga mei he Fungafonua ‘i he ho’ata Monite 14 'o 'Aokosi 'i he Uafu Faua.
Ko e vaka foki ko 'eni kuo fakahuafa 'e He'ene 'Afio koe MV Maui 'i he 'uhinga 'oku lahi 'a e fekau'aki 'a e hingoa Maui mo e ngaahi matanga 'iloa mo faka'ofo'ofa 'o e Fungafonua.
Ko e katoanga fakafiefia 'eni ki he kainga 'Eua pea na'e tefua mai honau tokolahi mei he Fungafonua ke kaunga kau ki he ma'alali ko'eni.
'I he katoanga hopoki ni na'e lea ai 'a e Sea 'o e Poate Vaka 'a 'Eua Sunia Fili pea na'a ne lave ai ki he hisitolia 'o e vaka ni 'a ia na'e fo'u 'i he ta'u 1990 ‘e he kautaha ko e Wavemaster International Proprietary Limited ‘oku nau peisi 'i Western Australia.
'I he fakamatala 'a Sunia Fili na'a ne fakamahino ai na’e fo’u 'a e vaka ni ma’ae kautaha Nu’usila ko e Fullers Group Limited ‘o NZ pea ko Poate Vaka 'a 'Eua koe ua 'aki pe ia 'a e kautaha kuo nau fakalele mo pule'i 'a e vaka ni.
Ko e fakaikiiki 'o e vaka ni 'oku mita ‘e 37 hono loloa pea mita 7.2 hono falahi pea 'oku misini waterjet ‘o ‘ikai ha tapili.
'Oku lele 'a e vaka ni 'i he vave 'oku a’u ki he noti 'e 25 pea 'oku fakafuofua ki he lita lolo ‘e 500 te ne ngaue’aki ki he houa pea tene malava ke uta ‘a e kau pasese 'e toko 390 mo e kau kauvaka ‘e toko 6.
Ko e mahu’inga foki 'o e vaka ni fakatatau ki he fakamatala 'a Sunia Fili ko e pa’anga ‘Amelika ‘e $800,000.00 ‘a ia ko e pa’anga Tonga ia ‘e $1,776,464.61.
‘I he fakamatala 'a Sunia Fili 'oku ‘i ai pe mo e ngaahi fakamole kehekehe ‘o kau ai e malu’i mo e fakafolau mai ‘o e vaka ni pea koe katoa ‘enau fakamole 'oku fe'unga mo e pa’anga Tonga ‘e $2.2 miliona.
Na'e noo foki 'a Poate Vaka 'a 'Eua 'i he Pangike Langa Fakalakalaka 'a Tonga pea na'a nau tipositi ai 'a e pa'anga Tonga 'e fitu kilu ($700,000) pea 'oku toe 'a e pa'anga Tonga 'e 1.5 miliona kenau totongi fakafoki.
Ko e Poate Vaka 'a 'Eua 'oku Sea ai 'a Sunia Fili, Hon. Tevita Lavemaau (Fakafofonga Fale Alea) Sosaia Hausia (Sekelitali) Va’inga Tonga (Pulengaue Va’a ‘i ‘Eua) pea mo Christopher ‘Ali (Pulengaue ‘Ofisi Nuku’alofa).
