Honge penisini ‘a Vava’u he taimi ‘oku fiema’u lahi taha ai ^Featured

Koe tā ‘eni ‘oku ongo pea fakamamahi ki he kau pisinisi ‘i he sekitoa takimamata kae tautautefito ki he taimi mo’ua taha ‘o e sekitoa ko’eni ‘i he taimi ‘o e mata tofua’a.

Kuopau ai ke toe fekumi ‘a e kau pisinisi ko’eni kiha founga ‘e malava ke ma’u ai ha’anau penisini ke fakakakato ‘a e fiema’u ki he’enau polokalama mo e kau folau’eve’eva ‘oku nau ‘ahia ‘a e fonua ‘i he faha’i ta’u mo’ua taha ‘o e takimamata ‘i Vava’u.

‘I he lau ‘a e ni’ihi ‘o e kau pisinisi ko’eni koe fatongia ‘eni ‘oku totonu ke tokanga kiai ‘a e Pule’anga he ko e pa’anga lahi ‘oku hū mai ki he fonua ‘i he mata tofua’a.

‘Oku mahino foki ‘oku lahi pe tīsolo mo e lolo kehe ka koe penisini ‘oku honge pea ‘oku ‘amanaki ke folau atu ‘a e ‘Otunga’ofa mo e penisini ke tokoni ki he honge ko’eni ‘oku hoko.

‘Oku kau foki mo e hoha’a ‘a e kakai ‘o e fonua he koe penisini ‘oku fakafalala kiai ‘a e fefononga’aki mo e ngaahi ma’u’anga ivi kehe.

‘I he fakamatala ‘a e taha ‘o e kau pisinisi takimamata na’a ne pehe ai ‘oku toe fakaholomui ko e ‘ikai ha tali pau mei he kau ma’u mafai fekau’aki mo e kaveinga ni.

‘I he taimi tatau ‘oku mahino pe ‘a e si’isi’i ‘a e tuku’anga lolo ‘a e Pacific Energy ‘i Toula pea ‘oku fiema’u foki ke fai ha ngāue fakavavevave ki he me’a ni.

Na’e kamata pe foki ‘a e honge penisini ia lolotonga ‘a e Konifelenisi ‘a e SUTT ‘i Vava’u pea ko’eni ‘oku toe hoko pe ka koe taimi ‘eni ‘oku fiema’u lahi ai.

Kapau ‘e ‘ikai solova leva ‘a e palopalema ko’eni pe ‘e uesia lahi ‘a e ngaahi pisinisi kuo ‘osi puka mo totongi mai ‘e he kau folau’eve’eva.