Koula ‘a e Kava Tonga mo e Vanila: Faka’alai’ali Ngoue 2017 ^Featured

Na’e mahino pe mei he Faka’aliali Ngoue ia ‘a e Vahefonua Vava’u ‘a e tu’unga ‘o e totongi ‘o e Kava Tonga ‘a ia ‘oku a’u ki he pa’anga ‘e $150 ki he kilo.

Na’e toe fakamahino foki ‘e he ‘Eiki Minisitā Ngoue Semisi Fakahau ‘i he Faka’ali’ali Ngoue ‘a e Vahefonua Niua Fo’ou ‘a e a’u ia ‘a e Vanila ki he tu’unga totongi ma’olunga taha ‘a ia koe $139 ‘Amelika ‘a ia ko e pa’anga Tonga ia ‘e meimei $280 ki he kilo.

Na'a ne toe me'a foki koe kelekele 'o Niua Fo'ou 'oku lelei taha ki he tō 'o e vanila. 'I he taimi tatau 'oku mahino ko e kelekele 'o Vava'u 'oku lelei ia ki he tō kava pehe ki he vanila foki.

‘Oku mahino mai mei he tu’unga ma’olunga ‘oku a’u kiai ‘a e totongi ‘o e ongo ngoue faka-komesiale ko’eni ko e vaivai ‘o e kau ngoue hono tō ‘o e ongo ngoue ni.

Ko e ngāue lahi 'i he la'ā. momoko mo e 'uha foki 'oku fakahoko ki hono tō 'o e ongo ngoue ni pea 'oku mo'oni 'etau lea Tonga pe ki he Folofola "'oku ma'u 'a e mā 'i he kakava".

‘Oku mahino pe foki koe tapuaki ‘eni ki he kau ngoue kau tautautefito ki he ‘otu motu Tokelau ‘o hange ko Vava’u mo e ongo Niua pea kuo a’u ‘eni ki he kakai na’e nofo muli kuo nau foki mai ki motu ke tō kava mo tō vanilla.