Fuofua tufunga Tonga ke ma'u faka'ilonga funga 'o e poloseki toe langa hake 'o Christchurch Featured
'Oku 'asi he taa ni mei hema 'a e tuofefine 'o 'Oini Saafi ko Siofau Saafi, 'Oini Saafi mo e tehina 'o e fa'e 'a 'Oini Saafi ko Fehi Langalanga Vikilani. Faitaa 'a e Kaniva Tonga
29 Sune, 2017. Kuo hoko 'a 'Oini Saafi 'o Kolomotu'a ko e fuofua tangata ngāue tufunga ia kene lava'i 'a e Levolo 4 'i he polokalama poloseki ki hono toe langa hake ‘o Christchurch hili ‘a e mofuike lahi he ngaahi ta'u kuo maliu atu.
Fakatatau ki he ongoongo a e Kaniva Tonga, na'e kau 'a 'Oini he kau tufunga 'e toko 24 na'e 'ave mei Tonga ni, Fisi, mo Ha'amoa 'i he polokalama ngāue fakataimi ki Nu’usila (Toli’akau) pea na'e fakalahi foki ke fakakau mai 'a e ngaahi ngāue kehe 'o kau ai 'a e sekitoa langa.
Na'e fakangāue'i ai 'a 'Oini 'e he kautaha langa 'i Christchurch ko e Adecco Personnel talu 'ene tu'uta ki Christchurch ‘i he mahina 'e ono kuohili.
Na'e ngāue 'aonga 'aki foki 'e 'Oini hono taimi 'ata kene to'o ai 'ene kalasi 'i he ‘apiako ARA 'o ako ai ki ha'ane tikite levolo 4 'i he tufunga pea na'e iku 'o ola lelei 'ene feinga ‘o foaki ai 'a e faka'ilonga ko'eni kiate ia.
Na'e ngāue foki 'a 'Oini 'i Tonga ni 'i he kautaha langa Cabella koe tokotaha leipa pea 'i he'ene fakamatala ki he ongoongo 'a e Kaniva Tonga na'e pa'anga Tonga 'e $3.50 ki he houa 'ene totongi 'i he tu’unga totongi ‘a Tonga ni.
Kaikehe ‘oku lolotonga totongi foki 'a 'Oini 'i he tu'unga 'a Nu'usila ‘i he pa’anga Nu’usila ‘e $35 ki he houa pea koe tikite mo e faka'ilonga ko'eni kuo foaki kiate ia 'e 'ikai ngata 'i he toe ma'olunga ange 'a e totongi tene ma’u ka ‘e toe faingofua ange hano haea ia 'e ha kautaha langa pe 'i Nu'usila pe koha toe fonua pe he 'oku toe fakatokanga'i fakamamani lahi 'a e taukei mo e faka'ilonga ko'eni kuo foaki kia ‘Oini.
‘Oku toe fakafiefia foki fakatatau ki he ongoongo ‘a e Kaniva he ko ‘Oini tokotaha pe mei he toko 24 na’e folau atu he poloseki ko’eni kuo foaki kiai ‘a e faka’ilonga ko’eni.
Ko e taha foki 'eni he ngaahi talanoa fakalotolahi ki he kumi mo'ui hotau kainga 'i he ngaahi faingamalie kuo foaki mei muli pea 'oku totonu ke tau ako mei ai.
