Feinga ke fakasi’isi’i hono fakamamahi'i kau fakalietī ‘i he ngaahi Ako’anga Featured
27 Ma’asi, 2017. Kuo kamata ‘e he kautaha ‘a e kau fakafāfine ‘a Tonga (Tonga’s Leitī Association) ha polokalama ‘i he ngaahi ako’anga ‘o fakataumu’a ke fakasi’isi’i hono fakamamahi’i ‘o e kau fakafāfine pe koe kau fakaleitī .
Ko e kemipeini ko’eni fakatatau ki he fakamatala ‘i he peesi facebook ‘a e Tonga’s Leitī Association na’e toki hopoki ‘i he mahina ni pea ‘oku nau tui tene ‘oange ha ‘atamai matala ki he kakai tenau taki ‘a e fonua ni ‘i he kaha’u.
'Oku ngaue'aki foki 'e he kemipeini ko'eni 'a e kaveinga ko e "Beauty of Oneness" pe ko e "Faka'ofo'ofa 'o 'etau hoko koe taha" 'a ia 'oku 'uhinga koe kakai pe 'e taha kae 'oua 'e fakakehekehe'i 'a e kau fakafāfine.
‘I he fakamatala ko’eni mei he TLA na’e toe fakahā ai mei he kautaha ni ‘oku ‘ikai taketi ‘a e kemipeini ko’eni ki he kau fakafāfine pe he ngaahi ako anga ka ki he katoa 'a e kau fakafāfine 'i Tonga ni katoa.
‘Oku nau tui ko hono fakamamahi’i mo e teketeke’i ‘o e kau memipa ko’eni ‘oku nau kei ako ‘i he ngaahi ako’anga ‘oku tupu mei heni ‘enau nofo he ako pea hoko ai pe ki he’enau tu’u lavea ngofua ki he ngaahi fakatauele ‘o kau ai ‘a e faihia mo fakamamahi ‘i he sosaieti.
‘Oku tui foki ‘a e kauataha TLA kapau ‘e malava eni ke solova neongo ‘ene faingata’a ‘e hoko ‘a Tonga koe fonua malu.
