Telio Kuini Fehuhu ‘Ofeina ‘o Tonga ‘i Mala’ekula Featured
1 Ma’asi, 2017. Na’e fakahoko 'a e ouau fakafonua hono telio ‘o e Ta'ahine Kuini Fehuhu ‘Ofeina ‘o Tonga Kuini Halaevalu Mata’aho ‘i he houa pongipongi ‘o e ‘aho ni 1 Ma’asi 2017 ‘i he fa'itoka faka-Tu'i 'i Mala’ekula.
Ko e ouau molumalu mo faka’ei’eiki 'eni ‘o tuha pe mo e tumutumu ‘o e fonua mo e Fale ‘o Ha’a Moheofo pea koe mole lahi 'eni ki he 'Otu Motu Anga'ofa 'i he tapa kotoa 'o e mo'ui.
Na’e tālolo ‘a e fonua ‘i he Mala’ekula pea ‘Afio ai mo e Tama Tu’i Tupou VI, Ta’ahine Kuini Nanasipau’u, Tu’i Maori, Tu’i Ha’amoa, Fale ‘o Ha’a Moheofo, Hou’eki e fonua, ‘Eiki Palēmia mo e Hou’eiki Kapineti, Kau Fakafofonga ngaahi Pule’anga Muli, Kau Takilotu, Kainga mo e Maheni, Ngaahi Kautaha Ongoongo mo e kakai ‘o e fonua.
Ko e malanga ‘o e ‘aho na’e fakahoko ia ‘e he Tangata’eiki Palesiteni Siasi Uesiliana Tau’atāina ‘o Tonga Faifekau Dr. ‘Ahio pea pea na’e tokoni kiate ia ‘a e ‘Eiki Katinali Soane Patita Mafi, Faifekau Dr. Tevita Koloa’ia Havea Sekelitali Siasi Uesiliana Tau’atāina ‘o Tonga, Faifekau Dr. Mele’ana Puloka palesiteni Ako Siasi Uesiliana Tau’atāina ‘o Tonga mo Faifekau Dr. ‘Alifaleti Malaki Mone ko e Palesiteni Malōlō Siasi Uesilana Tau’atāina ‘o Tonga.
Na’e fakahoko foki mo e ouau ‘e he Ha’a Tufunga 'o taki 'e Takapu pehe ki he ouau moe fakalangilangi 'ehe Kau Tau ‘Ene ‘Afio mo e ngaahi ouau anga maheni ‘oku tuha mo e ngeia ‘o e Fale ‘o Tupou.
Ko e pulonga mo e po'uli kuo tō 'i Tonga pea katoa 'a Tonga 'o taha 'i he lotu mo e tukufakaholo ke fakahā 'enau faka'apa'apa ki he Ta'ahine na'e laukau ai e fonua mo e lotu.
Ko e ‘aho ‘o e manatu melie ki he ngaahi to’onga mo e fua fatongia ‘a e Ta’ahine Kuini Fehuhu ‘ofeina ‘o e fonua na’e hoko pea ‘oku hoko koe sipinga ‘i he tapa kotoa ‘o e mo’ui ‘o mo’oni ai ‘a e lea Tonga “Mapaki ‘a e fā kae kei ‘alaha”.
