Liuaki Ta’ahine Kuini Fehuhu ki he ‘Otu Felenite Featured
Fe'unga tonu 'a hono fakahā'ele mai Ta'ahine Kuini fehuhu moe tomu'a Kolosi Kula. Faitā: Folau Helu
28 Fepueli, 2017. Na’e tu’uta ‘i he ho’atā ‘o e ‘aho ni ‘a e sino ‘o e Ta’ahine Kuini Fehuhu ‘ofeina ‘o Tonga Halaevalu Mata’aho ki he ‘Otu Felenite.
Ko e liuaki mai ‘eni ‘a e sino ‘o e Ta’ahine Kuini Fehuhu Halaevalu Mata’aho pea muimui folau mai ai ‘a e Ta’ahine Pilinisesi Sālote Mafile’o Pilolevu Tuita, Pilinisesi Lātūfuipeka Halaevalu Mata’aho mo e toko 18 kehe na’a nau fakafe’ao mai he folau ko’eni.
Ko e liuaki ko’eni ‘a e sino ‘o Ta’ahine na’e fakahoko mai ia ‘i he Vakapuna C 130 Hercule ‘a e Laulāpuna ‘a Nu’usila. Na’e ‘afio ‘o talitali atu foki ‘i he mala’e Vakapuna Fua’amotu ‘a ‘Ene ‘Afio Tupou VI, Ta’ahine Kuini Nanasipau’u, Pilinisi Kalauni Tupou To’a mo e Hou’eiki ‘o e fonua.
Na’e kau atu kiai mo e ‘Eiki Palēmia mo e Hou’eiki Memipa ‘o e Kapineti pehe ki he kau Fakafofonga ngaahi Pule’anga muli mo e kakai ‘o e fonua. Na'e me'a foki ai mo e 'Epeli Nailatikau 'o Fisi pehe kia Adi Koila 'a ia ko e fale ia 'o Tungi Fisi pea ko e fāmili ofi 'o e fale 'o Tupou pe he ki he 'Ulu 'o Ha'amoa Tupua Tamasese.
Na’e laine foki ‘a e fanauako ‘o e fonua mei he Mala’evakapuna Fua’amotu ‘o a’u mai ai pe ki he Palasi faka-Tu’i pea mahino lelei mei heni ‘a hono kei faka’apa’apa’ia ‘e he kakai ‘o e fonua ‘a e Tu’i mo e Hou’eiki.
Na’e si’i tālolo ‘o tangutu ‘a e fanauako mo e kau faiako ‘o kūnima pe mo punou neongo ‘ae ‘uha moe alotāmaki ke fakahā ‘enau faka’apa’apa ki he Kuini Fehuhu ‘ofeina ‘o Tonga.
‘Oku fakahoko ai pe ‘a e takipō‘i he po’uli ‘o e ‘aho ni pea ‘e telio ai pe ‘i Mala’ekula ‘i he ‘aho ‘a pongipongi 1 ‘o Ma’asi 2017 ‘a ia ‘oku faka’ilonga’i ia ‘e Pule’anga ko e ‘aho malōlō faka-Pule’anga.
