Fakafoki ‘a e toko 8 ‘o e kau toli mei Nu’usila koe anga ta’etaau Featured
8 Fepueli, 2017. Kuo fakafoki ha toko 8 ‘o e fanau na’a nau folau atu he polokalama toli fo’i akau ki Nu’usila makatu’unga he’enau ‘ulungaanga ta’etaau.
Kuo fakaha foki ‘e he CEO ‘a e Potugaue ki he Ngaahi Ngaue Lalahi ‘Ana Bing Fonua koe toko 8 ko’eni ‘oku tukuaki’i ki he konaa mo e fakatupu moveuveu pea ‘ikai malava ai ke fakahoko honau ngaahi fatongia.
Na’e toe mahino foki na’e ‘osi fakahoko pe ‘a e fakatokanga ki he fanau ko’eni ka na’e ‘ikai pe ke liliu ha me’a pea iku ai pe foki ki he tu’utu’uni ke fakafoki mai kinautolu ki Tonga ni.
Fakatatau ki he fakamatala ‘a Bing ki he Letio Tonga, koe toko 8 ko’eni ‘oku mahino mai ‘a e te’eki kenau matu’outu’a fe’unga ke mapule’i kinautolu.
Kaikehe na’e faka’ikai’i ‘e he taha ‘o e toko 8 ko’eni ‘a e ngaahi tukuaki’i ko’eni pea na’a ne tukuaki’i foki ‘a ‘enau supavaisa ki he’ene fakahoko ‘a e ngaahi fakamatala loi ‘o iku ai ki hono fakafoki mai kinautolu.
Ko e toko 8 foki ko’eni koe tokolahi taha mei Tofoa pea na’e fakaha foki ‘e he ‘Ofisakolo ‘o Tofoa ‘Usaia Fifita ‘ene fakame’apango’ia he me’a ko’eni he ‘oku ne ‘ave ‘a e ongoongo kovi fekau’aki mo e kolo.
