Pekia toko 4 Tonga he fakatu’utamaki Taulanga Kaipara ^Featured

Ko e fakatu’utāmaki foki ko’eni na’e hoko ia ‘i ha mafuli ‘a e vaka koe "Francie" ‘i ha’ane feinga ke hū ki tu’a ‘i he taulanga Kaipara ‘i he Tokelau Hihifo ‘o ‘Aokalani.

Ko e vaka foki ko’eni koe vaka haea ‘oku anga maheni ‘aki foki hono haea ‘eha kulupu pe ko kinautolu ‘oku manako taumata’u pea koe toko 11 na'e folau 'i he vaka ni ko'enau taumata'u.

Fakatatau ki he fakamatala ‘a e kau polisi ‘i he vahenga ni koe toko 7 ko’eni kuo ma’u honau sino koe kakai mei he ‘Otu Motu Pasifiki tukukehe pe ‘a ‘eikivaka William McNatty ko e matāpule papalangi. Ko e toko 3 foki na'e hao mo'ui pea koe toko 2 'o kinautolu koe ongo Tonga.

‘I he fakamatala ‘a e ‘Inisipekita ko Willi Fanene ma’a e kau polisi na’a ne fakahā ai ‘i hono lipooti ‘e he Televīsone Nu’usila koe kau pekia ‘oku nau ‘i he vaha’a ‘o e ta’u 31-59 ‘a ia koe toko 4 Tonga, 1 Ha’amoa mo e toko 1 mei he ‘Otu Motu Kuki.

‘Oku lolotnga fakahoko e fekumi ki he matāpule ‘oku te’eki ma’u hono sino ‘a ia koe matāpule mei he ‘Otu Motu Kuki.

‘I he fakamatala ‘a e kau polisi ‘oku pehe ai na’e ‘i ai pe ‘a e ngaahi me’a kakau ‘i he vaka ka ‘oku ‘ikai fakapapau’i pe na’e ngaue’aki pe ‘ikai.

‘Oku mahino foki mei he ngaahi fakamatala kuo tuku mai ‘e he ngaahi kautaha ongoongo moe fakamatala mei he kau polisi mo e ma'u mafai na’e mālohi ‘a e matangi pea na’e aake ‘a e peau ‘o a’u ki he mita ‘e 4 pea fakatu’utamaki ke fakahoko ha kolosi ki tu’a.

Ko e toko 2 ‘o e kau pekia Tonga kuo fakahā hona hingoa ‘a ia ko Alipate 'Pate' Manumu'a pea mo Sunia 'Junior' Onga'unga hange ko hono lipooti ‘e he nusipepa New Zealand Herald ‘i he efiafi Sāpate 28. Koe ongo pekia ko’eni ‘oku na tokoua fakatoto (cousins) pea ‘oku na ta’u tolungofulu tupu.

‘Oku fakaloloma foki he ‘oku ‘i ai mo’ena ki’i fanau ‘oku nau kei iiki. ‘Oku te’eki ke fakapapau’i mai ‘a e hingoa ‘o e ongo pekia Tonga kehe ka ‘oku hokohoko atu pe ‘a e ngāue mo e fekumi ‘a e ma’umafai ki he sino ‘oku kei puli mo e tupu’anga ‘o e fakatu’utamaki ni.