Foaki fakalangilangi ma’olunga ‘a e Pasifiki ki he ongo Polisi Tonga Featured
Superintendent Tevita Vailea mo Chief Inspector Meleane Taueli
15 'Okatopa, 2016. Kuo foaki kia Superintendent Tevita Vailea (44) mo Chief Inspector Meleane Taueli (54) ‘a e pale fakalangilangi ‘oku ‘iloa koe 2016 Pacific Islands Chiefs of Police Chair’s Award. Ko e fili foki ‘a e toko 2 ko’eni mei he kau Polisi tu’ukimu’a ‘e 10 na’e fakahu atu mei he ngaahi Fonua memipa ‘o e Pasifiki.
Na’e talu foki hono kamata ‘a e polokalama foaki pale ko’eni mei he ta’u 2005 pea koe toki fuofua fokotu’u atu ‘eni ha tokoua mei Tonga ni pea tali lelei kena kau ki he fakalangilangi ko’eni.
Na’e foaki foki ‘a e pale ko’eni ‘i Tahiti ‘i he faka’osinga ‘o Sepitema lolotonga ‘a e konifelenisi hono 45 ‘a e kau Pule Polisi ‘a e Pasifiki pea na’e ma’u foki ‘e he Komisiona Polisi ‘a Tonga Stephen Caldwell ‘a e pale ‘o Tevita Vailea.
Ko Vailea foki ‘a e pule ‘o e ‘apiako Polisi ‘i Longolongo pea koe ta’u ‘eni ‘e 24 ‘ene hoko koe Polisi. Na’e fokotu’u foki ‘a Vailea ki he pale falangilangi ko’eni makatu’unga ‘i he’ene ngaue ki he tafa’aki ‘o e faka’ilonga nima (forensic [fingerprint]) pea mo ‘ene kau atu ki hono ako’i ‘a e kau polisi ‘a e Pasifiki. Kuo hoko foki ‘a Vailea koe mataotao ‘i he tafa’aki ko’eni ‘i he Pasifiki.
Ko Taueli koe ta’u ‘eni ‘e 35 ‘ene Polisi pea ‘oku lolotonga ngaue ‘i he va’a Tu’unga Polofesinale ‘a e Potungaue Polisi ‘a Tonga. Na’e fokotu’u foki ‘a Taueli makatu’unga ‘i he’ene taukei mo ‘ene kaunga ki hono fokotu’u ‘a e tafa’aki ki he ma’u’anga fakamatala ‘a e Potungaue Polisi ‘a Tonga.
‘Oku ho’ata mei he ongo pale ko’eni ‘a e tu’unga ma’olunga kuo a’u kiai ‘a e Potungaue Polisi ‘a Tonga.
