Fakafiefia hono toe ma’u e vaka mole ^Featured

Ko e vaka mita ‘e 11 foki ‘eni pea ko e kau pasese na’e toko 6 kakai lalahi mo e longa’i fanau ‘e toko 5.

Na’e lipooti foki mei he kau ma’u mafai ‘i he efiafi Tusite 28 ‘o e uike ni na’e ma’u ha telefoni mei he taha ‘o e kau pasese ki hono famili pe ‘i Fonoifua ‘o fakaha kiai ‘a e feitu’u ‘oku nau ‘i ai pea toki fai mei ai ‘a e fetu’utaki ki he kau polisi.

Fakatatau ki he fakamatala ‘a e ‘eikivaka Tevita Fonua na’e mavahe foki ‘a e vaka ni mei Nuku’alofa ‘i he efiafi Monite 27 ‘i he taimi 2:00pm ‘o ‘amanaki ke tu’uta ki Fonoifua ‘i he taimi 10:00 pm ‘o e efiafi pe koia. Na’e to ‘a e ki’i ‘uho’uha pea angiangi malohi ‘a e matangi ‘o tupu mei ai ‘a e ‘ikai ke fai ha sio ki ha fonua. Na’e pau ai ke li taula ‘a e vaka ka nau malolo he po koia kae toki hoko atu ‘a e folau.

Na’e mahino na’e ‘ikai ke tu’uma’u ‘a e taula pea nau tetee ai ‘o mahino kuo ‘ikai mahino ‘a e taumu’a folau. Na’e iku foki ke foki ‘a e folau ki Nuku’alofa pea na’a nau fakatokanga’i ‘a ‘Eua ‘i he efiafi Tusite 28. Na’e faingamalie ‘i he ofi mai ki Nuku’alofa neongo na’e matemate ‘a e misini ke fakahoko mei ai ‘a e telefoni ki Fonoifua hili ‘a e malava ke ma’u ‘a e netiueka telefoni.

Fakatatau ki he fakamatala ‘a e ‘eikivaka na’e taulani kinautolu ‘eha vaka toutai mei Nomuka ‘i he’enau ofi atu ki Pangaimotu ‘o nau tu’uta ai pe ki he uafu faua. Ko e vaka na’e ‘ikai ha naunau fetu’utaki pea koe si’isi’I taha he folau ko e ki’i ta’ahine ta’u 2.