Faiva'i e talanoa Mo'oni 'e he Kautaha Siamane ‘i Vava’u Featured
Neiafu, 3 Me 2016. ‘Oku lolotonga hokohoko lelei atu ai pe ‘i he Lolo ‘a Halaevalu ‘a hono ‘eti ‘o e faiva ‘oku ‘oku fakatumu’a ki hano filimi’i ha talanoa mo’oni ‘a ia na’e hoko tonu pe ‘i Vava’u.
‘Oku ‘i Vava’u foki ‘a e kau kulū ‘a ia ‘oku fakafuofua honau tokolahi ki he toko 20 ke fakahoko ‘a hono filimi’i ‘o e talanoa ni. ‘Oku kau foki heni mo e tamaiki Tonga ‘a ia ‘oku nau ngaue tokoni mo kau foki he ngaahi ‘ata ‘o e faiva ni.
Na’e a’u tonu foki ‘a e ongoongo ‘a e Nepituno ki he Kefei Tropicana (Tropicana Café) ‘i loto Neiafu ‘a ia na’e fakahoko ai ‘a hono filimi’i ‘o e faiva ni ‘i he ‘aho ni ‘aho Tusite 3 ‘o ‘Epeleli 2016. ‘I ha fakamatala ‘a e taha ‘o e kau kulū ka ‘oku ‘ikai loto ke fakahā hono hingoa ‘oku te’eki ke maau malie ha’a nau fokotu’utu’u ke tukuatu ki he ngaahi kautaha mitia ‘a e hingoa mo e fakaikiiki ‘o e faiva ni ka ‘oku nau ‘ohovale ‘i anga fakakaume’a ‘a e kakai ‘o Vava’u tukukehe ange ‘a e faka’ofo’ofa faka-natula ‘a e fonua.
‘Oku talēkita ‘i hono ‘eti ‘o e faiva ko’eni ‘a e tangata fa’u filimi Siamane ko Florian Schewe pea ‘oku ‘amanaki kenau toki mavahe atu mei Vava’u ‘i he uike faka’osi ‘o e mahina ni.
Fakatatau ki he fakamatala ‘a e tangata ‘oku ‘a’ana ‘a e Tropicana Café Greg Just ‘oku kau lelei ‘eni ki he pisinisi faka-Takimamata ‘i Vava’u pea ‘oku ne fakafuofua ki he pa’anga ‘e 200,000 USD ‘e tuku he ‘ikonomika ‘o Vava’u lolotonga hono ‘eti e faiva ni.
