Tali 'e he Kapineti Lipooti 'a e Ma'u Mafai Vāhenga Featured
TALI ‘E HE KAPINETI LIPOOTI ‘A E MA’U MAFAI VᾹHENGA, ‘ULUAKI LIPOOTI KI HE NGAAHI VᾹHENGA, SUNE 2014, MO E LIPOOTI HONO UA, SEPITEMA 2015
1. Tu’utu’uni Kapineti ki he ‘Uluaki Lipooti ki he Ngaahi Vāhenga, Sune 2014
Na’e tali ‘e he Kapineti, ‘i he‘ene fakataha ‘i he ‘aho Pulelulu 13 ‘Epeleli 2016 ‘a e ‘Uluaki Lipooti ki he Ngaahi Vāhenga, Sune 2014, ke kamata ngaue’aki ‘i he ‘aho 1 Siulai 2016.
‘E fakahoko ‘a e ngaue ki he fa’unga vāhenga ‘i he ‘Uluaki Lipooti, ke fakakau mai ‘a e ngaahi fakamatala kuo tanaki kimui ni mai talu mei he 2014 kau ai mo e fakafehoanaki ki he Lipooti hono Ua ‘a e Ma’u Mafai.
Ko kinautolu kotoape ‘i he ‘Uluaki Lipooti, ‘oku ‘oange ‘a e faingamālie ke nau ‘omai ha’anau ngaahi ta’efiemālie fekau’aki mo e ngaahi fokotu’u ki honau ngaahi lakanga takitaha (appeal process). ‘E kamata leva ‘a e ngaue ki hono toe vakai’i ha ngaahi ta’efiemālie, pea ke fakakakato ia ki he faka’osinga ‘o Sune, kimu’a ‘i hono kamata ngaue’aki ‘i he ‘aho 1 Siulai 2016.
Ko e kau ngaue kotoa ‘i he ‘Uluaki Lipooti, te nau ‘omai hangatonu ‘enau ngaahi ta’efiemālie ki he Ma’u Mafai Vāhenga, fakafou mai ‘i he‘enau kau Pule Ngaue (CEO). Ko e lisi ‘o e taimi ke fakahoko ai ‘a hono vakai’i ‘o e ngaahi ta’efiemālie ‘i he ‘Uluaki Lipooti, ‘e tuku atu ia ‘e he Ma’u Mafai Vahenga ‘i he ‘aho 18 ‘Epeleli 2016.
2. Tu’utu’uni Kapineti ki he Lipooti Ua ki he Ngaahi Vāhenga, Sepitema 2015
Na’e tali ‘e he fakataha Kapineti ‘i he ‘aho Pulelulu 13 ‘Epeleli 2016 ‘a e toe fakahū atu ‘o e Lipooti Ua ‘a e Ma’u Mafai Vāhenga, Sepitema 2015 ke kamata ngaue’aki ‘i he ‘aho 1 Siulai 2016. Na’e fakatefito ‘a e tu’utu’uni ‘a e Kapineti ‘i ha pepa na’e fakahū atu ‘e he Komisoni ‘a e Kau Ngāue Fakapule’anga (PSC) mo e Ma’u Mafai Vāhengá.
Na’e toe tali foki ‘e he Kapinetí mo e fokotu’utu’u ki he ngaue ki ha ngaahi ta’efiemālie ke kamata leva ia pea ke fakahoko ‘e he Komisoni ‘a e Kau Ngaue Fakapule’anga (fakatatau ki he Lao ‘a e PSC) pea ke maau ‘a e ngaahi fokotu’utu’u ko eni kimu’a ‘i he ‘aho 1 Siulai 2016.
Ko e Kau Ngāue Fakapule’anga ko ia ‘i he Lipooti Ua ‘e fakahū ‘enau ta’efiemālie ki he PSC, pea ‘e lava ‘a e PSC ke kumi fale’i mei he Ma’u Mafai Vāhengá. Ko e fokotu’utu’u ki he ngaahi ta’efiemalie mo e taimi ki he ngaue ni ‘e toki fakahoko atu ia ‘e he PSC ‘i he ‘aho Monite 18 ‘Epeleli 2016.
Ko e ngaue ke teuteu ki hono fakahoko ‘o e Lipooti Ua ‘e fai ia ‘e he PSC fakataha mo e Potungaue Pa’anga mo e Palani Fakafonua mo e Ma’u Mafai Vāhenga, pea ke lipooti fakamāhina ki he Kapineti ‘a e tu’unga ‘o e ngaue ‘i he ‘osi ‘a ‘Epeleli, Mē, Sune mo Siulai 2016.
Ki ha toe fakamatala fekau’aki mo e ‘Uluaki Lipooti, kataki fetu’utaki ki he ‘Ofisi ‘o e Ma’u Mafai Vāhenga ‘i he telefoni 28703 pe ko e fetu’utaki ki he ‘imeili:This email address is being protected from spambots. You need JavaScript enabled to view it.
Ki ha toe fakamatala fekau’aki mo e Lipooti Ua, kataki fetu’utaki ki he PSC.
