Faka’ikai’i ‘e he Palēmia ‘a e tukuaki’i ‘oku fakafaingata’a’ia’i ‘e hono Pule’anga ‘a e ongoongo Featured
Kalafi Moala mo Hon. 'Akilisi Pohiva
Nuku'alofa, 4 April 2016. Kuo faka’ikai’i mamafa ‘e he Palēmia ‘Akilisi Pohiva ‘a hono tukuaki’i ‘e he ngaahi kautaha ongoongo ‘oku ne fakafaingata’a’ia’i mo hono Pule’anga ‘a hono tuku atu ki tu’a ‘a e ngaahi fakamatala fekau’aki mo hono tataki e hono Pule’anga ‘a e fonua.
Na’e fakahā foki ‘e Kalafi Moala ko e taha ‘o e kau faiongoongo mo faipulusi taukei mo fuoloa taha ‘i he fonua ki he Letiō Nu’usila ko e toki Pule’anga ‘eni ‘oku nau fakafaingata’a’ia’i lahi taha hono tukuange ‘a e ongoongo ki he kakai ‘o e fonua ‘i he hisitōlia ‘o Tonga (Democratic Party government was the most closed in the country's history).
Na’e toe tuku atu foki ‘e he ongoongo ni ‘a e fiu feinga ‘a e kau faiongoongo ke fakahoko ha konifelenisi ‘a e kau faiongoongo mo e Palēmia fekau’aki mo e palopalema ‘i he Potungāue Ako mo e ‘ikai pe. Na’e makatu’uunga ‘eni ‘i he tō lalo ‘a e sivi ‘a e foomu 5, 6, mo e 7 ‘a e ngaahi kolisi ‘i Tonga ni ‘o tupunga mei hono fakavave’i ‘a e liliu ke ngaue’aki ‘a e maaka to’ofua (raw marks). Ko e kaveinga ‘eni ‘oku kei tuku tatali kiai ‘a e fonua ke ‘omi ha tali mei he Palēmia ka koia ‘oku Minisitā Ako mo e ‘ikai pe.
Kaikehe neongo ‘eni ‘oku tu’ukāivi pe ‘a e Palēmia ‘o faka’ikai’i ‘eni pea ne fakahā ‘oku hala ‘a e ngaahi tukuaki’i ko’eni he ‘oku ‘atā pe ia he taimi kotoa pea ‘atā mo hono ‘ofisi ki ha fiema’u ‘a e kau faiongoongo. Na’a ne toe fakahā foki ‘oku fakame’apango’ia ‘i he ‘ikai ke fakahā kiate ia ‘e he’ene kau ‘ofisa ma’olunga ‘a e fiema’u mei he ngaahi kautaha ongoongo.
Kaikehe na’e fakahā foki ‘e Kalafi Moala ‘a ia koe fale’i faka-mitia malōlō ‘a e Palēmia mo e Pule’anga lolotonga na’e ‘i ai ‘a e feinga ‘a e Pule’anga ke pule’i ‘a e fetafeaki ‘a e ongoongo mo e ngaahi fakamatala ‘i he fonua.
2 comments
-
Na kuo si'i kuihi e fanau ia 'e ha 'uha koini ku nau si'i kei poupou ai ki he Tamai ha ha ha! Ko e anga pe ki'i 'ai ...
-
Pehe 'ehe Palemia "‘oku fakame’apango’ia ‘i he ‘ikai ke fakahā kiate ia ‘e he’ene kau ‘ofisa ma’olunga ‘a e fiema’u mei he ngaahi kautaha ongoongo" , malie PM e heke. He'ikai pe toe tuku 'ene tukuaki'i takai holo e kakai. Koe hoko pe ha me'a koe vave atu hono teke'i ki ha taha kehe, 'Oku ne kei pehe pe 'e ia ko ia pe 'oku tonu taha, koe vakai 'oku tekeutua mai hange ko Kao 'ene faihala moe maumau'i e lao kae fei tu'ukaivi mai pe. Kole atu kihe fanau mou 'ofa mai 'o taki atu a ho'omou tangata'eiki ki 'api he'ene kei sai pea mo nofo ai 'o feinga ke fakalele homou 'api mo homou famili, tuku mai e pule'anga ia he 'oku fokotu'una e kakai te nau lava 'o fakalele 'o toe sai 'aupito ange.