“ 'Oku lau 'ehe vusika 'oku 'ikai fakatupu pe faka'auha 'ae ivi (energy) ka 'oku liliu fakafelavai / fakafuopotopoto pe mei he fuo / fotunga 'e taha kihe fuo 'e taha 'i natula, 'o hange koe liliu fakafelavai 'ae vai kihe mao, mao kihe 'ao, 'ao kihe 'uha moe 'uho kihe vai moe liliu fakafelavai 'ae fefie kihe afi, afi kihe maama moe maama kihe mafana moe ha fua.
'Oku toe 'asi 'ae fokotu'utu'u fafafelavai 'oe ivi 'i natula he liliu fakafuopotopoto 'ae lau 'aho (loloa, nonou moe ha fua), lau po (mahina, valengapo moe ha fua), lau mahina (katoa, kalipa moe ha fua), lau fa'ahita'u (afa, 'uha moe ha fua) moe lau ta'u (lahi, si'i moe ga fua), 'o hange koe lau matangi (malohi, mafana moe ha fua) moe lau peau (kula, akefua moe ha fua) moe ha fua.
'Oku toe lau 'ehe vusika 'oku 'ikai koe ivi 'ae matangi moe vai / tahi ka koe ongo vaka 'oku heka mai ai 'ae ivi, 'o hange ko 'ene vaka mai he mata moe hikuhiku 'oe matangi moe mata moe hikuhiku 'oe peau (vai / tahi), 'aia 'oku tefito ai 'ae fua 'oe malohi moe vaivai 'ae matangi moe peau moe ha fua.
'Oku hoko 'ae fefusiaki moe fetekeaki (as opposite forces) 'ae ivi 'i natula ke tupu ai 'ene fepaki he funga 'oe tokehekehe moe potupotukehekehe pe ko 'ene fenapasi he funga 'oe totatau mo potupotutatau. 'Oku fakalalahi 'ae fepakipaki 'ae ivi 'i natula koe tupu mei matolutu'u 'ae ivi he feitu'u 'e taha kae manifitu'u he feitu'u 'e taha, 'o hoko 'ene ta'efenapasi ke tupu ai 'ae toe mafana ange mo mafana ange 'ae matangi moe tahi, 'aia 'oku 'uhinga koe toe vela ange mo vela ange 'a Mamani, 'o hoko kene tamate'i 'ae me'amo'ui kotoa pe.
'Oku toe 'uhinga leva ia koe toe lahi ange 'ae afa moe matangi malohi mo ngotofu'u 'o puli 'ae ngaahi motu iiki moe matatahi ma'olalo he konga lahi 'o Mamani (problem of climate change). Na'e puli 'ae motu'a Mamani 'oe tainasoa he ngaahi lauimiliona ta'u kuo maliu koe tupu mei he pa 'ae ngaahi fetu'uto mei he vava 'o to 'i Mamani, 'aia na'e ofi hono fu'ufu'unga malohi he ongo pomu 'atomi na'e li 'i Siapani he Tau Lahi Hono II 'a Mamani.
'Ofa atu moe 'amanaki ma'u,
Hufanga ”