Feinga Malu'i Sea Poate Takimamata Totongi Pa’anga ki he ‘Unuaki ‘o Tonga Featured
Nuku’alofa, 15 Sanuali 2015. ‘Oku nga’unu atu ‘a e fonua kiha taimi kuo hoko ‘a e feinga ke fakapulou’i ‘a e mo’oni ha me’a noa pe ki he ni’ihi ‘oku nau ngāuehala ‘aki ‘a e mafai ‘i he ngaahi Poate mo e Potungāue ‘a e Pule’anga.
'Oku 'uhinga 'eni ki he filifilimanako (nepotism), pule kovi mo e 'ikai fou he founga ngaue fakatatau ki he Lao pea 'oku 'i ai 'a e totonu fonua kenau 'ilo kiai. Kuo faka’ikai’i mamafa ‘e Tomifa Paea ko e Sea ‘o e Poate Ma’u Mafai Takimamata ‘a Tonga (Tonga Tourism Authority) ‘a e ongoongo na’e ‘oatu ‘e he Nepituno na’e totongi ‘a e $53200 kia ‘Akosita Lavulavu mo e ‘Apiako ‘Unuaki ‘o Tonga.
Na’e tukumai foki ‘e he ongoongo ‘a e Letio Tonga ‘i he ‘aho Falaite 15 ‘o Sanuali ‘a e faka’ikai’i ‘e Paea ‘a e fakamatala ko’eni. ‘I he taimi tatau ‘oku ma’u kakato pe foki ‘e he Nepituno ‘a e tatau ‘o e ngaahi ‘inivoisi mei he ‘Unuaki ‘o Tonga ki he Potungaue Takimamata fekau’aki mo e ngāue ‘a e kau tame’alea ‘a ‘Akosita Lavulavu mo e ‘Apiako 'Unuaki ‘o Tonga ‘a ia ‘oku ‘i he mahu’inga koe $53200.
‘Oku ma’u pe foki mo e tatau ‘o e tohi ‘imeili mei he ‘Unuaki ‘o Tonga mei he tu’asila ‘imeili koe This email address is being protected from spambots. You need JavaScript enabled to view it. pea hikitatau (cc) kia ‘Akosita Lavulavu ‘i he ‘aho 20 Tisema 2015 ki he Sea Paote TTA Tomifa Paea na’e fakalea ‘o pehe ni;
Date: Sun, 20 Dec 2015 16:41:38 +1300
Subject: Fwd: 'Unuaki-'o-Tonga Royal Institute Invoices
From: This email address is being protected from spambots. You need JavaScript enabled to view it.
To: This email address is being protected from spambots. You need JavaScript enabled to view it.
CC: This email address is being protected from spambots. You need JavaScript enabled to view it.
Dear Tomifa Paea,
Please Kindly see attachment attached as discussed. This is from the 17th July to the 18th
December and also a summary of all flights. Liku'alofa will be sending in their invoices shortly. Ko e si'i Kole atu pe ho'o tokoni Tomifa ke sii ma'u ha ki'i seniti ke Kilisimasi 'aki he fanau mo honau famili, he koe si'i talu ee ta'evahe mei Siulai.
'Ofa ke faitaupuekina koe 'e he 'Otua ho ngaahi feinga kotoa pe, pea 'Ofa keke ma'u mo ho famili ha Kilisimasi fiefia mo ha ta'u fo'ou monu'ia.
Malo.
Oku toe ma’u foki moe tatau ‘a e tohi ‘a Tomifa Paea ‘i he ‘aho 21 ‘o Tisema 2015 kia Owen Pau’u ko e Pule Le’ole’o ‘o e TTA ke totongi ‘a e ngaahi ‘inivoisi ‘a ‘Akosita mo e ‘Uniaki ‘o Tonga pea ke fakahu ki he Poate ke fakapaasi mei ai. Ko e ‘inivoisi kotoa ‘e 23 meihe ‘Unuaki ‘o Tonga 'a ia na'e 'i he mahu'inga ko e $53200 pea ko e taha ‘eni ‘o e ngaahi ‘inivoisi ‘oku hā atu ko’eni ko e sipinga.
Kaikehe ‘oku feinga ‘a e Sea ‘o e Poate TTA Tomifa Paea ke ‘ufi’ufi pea tala ‘oku ‘ikai ke mo’oni ‘eni ka ‘oku maau malie ‘a e ngaahi fakamatala ko’eni pehe ki he ngaahi fakamo’oni tohi kiai. ‘Ikai ngata ai ka ‘oku ma’u mo e fakamatala falala’anga na’e fakahoko hono totongi ‘a e ngaahi ‘inivoisi ko’eni ‘i he ‘aho 22 ‘o Tisema 2015 ko e ‘aho ia na’e tapuni ai ‘a Pule’anga ki he ta’u ngaue 2015.
‘Oku malie he ‘oku ma’u lelei ‘e he Nepituno ‘a fika ‘o e sieke na’e fakahoko ‘aki ‘a e totongi koe sieke fika 000974 ‘a e Tonga Tourism Authority ‘i he BSP Bank Tonga. ‘I he taimi tatau ‘oku ma’u mo e fakamatala ‘oku te’eki ke tukuange ‘a e sieke ko’eni ‘e he BSP he ‘oku te’eki ke kakato ange ‘a e ngaahi fiema’u fakalao mei he TTA ki he Poate ‘a ia ‘oku fekau’aki ‘eni mo e liliu ‘o e fakamo’oni meia Owen Pau’u ‘a ia koe Pule Le’ole’o malōlo ia kuo tu’utu’uni ‘e he Poate TTA ke to’o mei ai ‘a e le’ole’o kia Mana Kite. ‘Oku kau ki heni mo e tu’utu’uni ‘a e Poate ki he fetongi ko’eni kae malava ke tukuange ‘a e totongi.
Ko e poini heni koe totongi kuo ‘osi fakahoko neongo ‘a e feinga ke malu’i mo ‘ufi’ufi ‘a e ngaahi ngāue ‘oku fehu’ia ko’eni. Na'e toe ma'u foki mo e fakamatala na'e faka'ikai'i 'e Paea 'a e mahu'inga ko'eni ka 'oku 'oatu pe 'e he ongoongo ni 'a e mahu'inga na'e 'inivoisi ki he Potungāue Takimamata neongo na'e iku totongi 'eni 'e he Poate Takimamata pea koe ongo sino kehekehe 'eni 'e ua. 'I he taimi tatau ko e mahu'inga 'o e sieke fika 000974 neongo 'oku hā mai 'oku kehekehe ka 'oku 'eve'eva atu pe he laini tatau.
Kaikehe, neongo 'a hono feinga'i ke tanu 'eni ka ‘e ‘ikai puli ‘a e mo’oni pea 'o hange ko e lau 'a e hiva 'a e kau kava Tonga "'e ‘ikai tō ha namu ta’e ‘ilo mei langi".
