Totongi Poate Takimamata Pa’anga ‘e $53200.00 kia ‘Akosita Lavulavu mo e ‘Unuaki ‘o Tonga Featured
Hon. 'Etuate Sungalu Lavulavu mo hono Hoa koe Pule 'o e 'Apiako 'Unuaki 'o Tonga 'Akosita Lavulavu
Nuku’alofa, 12 Sanuali, 2015. Kuo ma’u ‘e he ongoongo ni ha fakamatala falala’anga kuo totongi ‘e he Poate Takimamata ‘a Tonga ‘a e $53200.00 kia ‘Akosita Lavulavu mo e ‘Apiako ‘Unuaki ‘o Tonga.
Ko e totongi ‘eni ki he kau tame'a tokua ‘a e ‘Apiako ‘Unuaki ‘o Tonga ‘a ia ‘oku Puleako ai ‘a ‘Akosita Lavulavu ko e mali ‘o ‘Etuate Lavulavu ko e Minisitā ‘oku ne tokanga’i ‘a e Takimamata.
‘Oku mahino mai foki mei he fakamatala ‘oku ma’u ‘e he Nepituno na’e ‘ikai ha kaunga ‘e taha ‘a e Poate Takimamata ‘a Tonga (Tonga Tourism Authority) ki ha aleapau mo e kulupu tame’alea ko’eni ‘a e ‘Unuaki ‘o Tonga mo ‘Akosita Lavulavu ‘a ia ‘oku nau tame’a ‘i hono talitali ‘o e vakapuna kotoa ‘oku folau mai ki Tonga ni mei Tu’apule’anga ki he Mala’evakapuna Fuaa’amotu. 'I he taimi tatau foki 'oku 'i ai pe foki 'a e palani ngaue ia 'a e Mafai Pule ko'eni ki he Takimamata.
Ko e fo’i fakatuputupulangi ko’eni na’e toki fokotu’u pe ‘e Lavulavu hili hono ‘oange kiate ia ‘a e mafai kene tokanga’i ‘a e Potungāue Takimamata neongo ‘oku ‘ikai ha Potungāue pehe ‘o fakatatau ki he Lao ‘o e fonua. Na’e ma’u ‘e he Poate Takimamata (TTA) ha ‘imeili ‘i he ‘aho 21 ‘o Tisema 2015 meia Tomifā Paea ko e Sea ‘o e Poate Takimamata ‘a Tonga (TTA) ‘o tu’utu’uni mai ai ke totongi ‘e he Poate ‘a e pa’anga ko’eni kia ‘Akosita Lavulavu mo e ‘Apiako ‘Unuaki ‘o Tonga ki he ngaahi sevesi ‘oku fakahoko ‘e he kau tame’alea ‘a e ‘Akosita mo e ‘Apiako ‘Unuaki ‘o Tonga ‘oku nau fatongia ‘aki hono talitali ‘o e kau folau ‘eve’eva ‘i he Mala’evakapuna Fua’amotu.
‘Oku malie foki he koe ‘aho 22 pe ‘o Tisema kuo fakahoko ‘a e fakataha ‘a e Poate TTA ‘o paasi ‘a e fokotu’u ko’eni pea na’e ‘i ai tonu pe ‘a e Minisitā Takimamata he Fakataha Poate ko’eni. ‘Oku fehu’ia foki ‘a e ‘uhinga ‘o e kau atu ‘a e Minisitā ki he Fakataha Poate ko’eni he ‘oku ‘ikai ha’ane kaunga kiai ‘o fakatatau ki he tau’ataina ‘a e Poate ko’eni pea ‘oku tekeutua mai pe foki ‘a e ‘uhinga ki he sio ‘a e kakai ‘oe fonua. Ko e Tomifa Paea foki koe kaungame'a ofi ia 'o Lavulavu 'i he ngaahi 'aho ni pea na'a tau toki situ'a atu pe foki 'eni mei hono teu fakatau pa'anga 'e taha miliona 'e he Potungaue Ngaahi Ngaue Lalahi na'e Minisita ai 'a Lavulavu 'a e ngaahi me'angaue 'a Tomifa Paea pea koe me'a malie hono fakatokanga'i.
‘Oku ‘ikai pe ke maholoholo ‘a hono ngāue hala ‘aki ‘o e mafai mo e ‘ikai fou he founga ngāue pea toe hulu atu foki ‘a hono fakafāmili’i ‘o e ngaue pea koe ‘uhinga tatau pe ‘eni na’e faka’ilo faka-Fale Alea ai ‘a Lavulavu pea ‘oku hoko atu foki ki hono faka’ilo hia 'i he fa'ahinga founga ngaue ko'eni. 'Oku faka'ofa 'a e fonua he 'oku mahino mai 'a e fakaaoao moe ta'etoka'i pea 'ikai pe ha teki mai ki he sio atu 'a e kakai 'o e fonua.
‘Oku toe fehu’ia heni ‘a e founga na’e fili ‘aki ‘a e kau memipa Poate ko’eni he kuo mahino mai kuo fakafisi mei he Poate ‘a e Kau Talēkita ‘a e TTA ‘a e kakai pisinisi falala’anga pea ‘oku ‘ilo’i kinautolu he mo’ui ‘enau pisinisi hangē ko Ross Chapman koe Sea malōlō, Shane Walker mo Paul Johanson ka e fetongi mai ‘e Tomifa Paea ‘o hoko ko e Sea pea kau mai kiai mo Simana Kami, Finau Uata mo Kisione Pakalani.
Ko e founga na’e fili ‘aki ‘a e kau Talekita Poate ko’eni na’e fili pe ia ‘e he Minisitā ‘o ‘ikai fou he founga (polosesi) 'oku tu'utu'uni 'e he Lao ‘o hange ko hono fili ‘o e Kau Talekita kimu’a ‘o fakatatau ki he Lao ‘o e Tonga Tourism Authority na’e paasi ‘i he 2012 kae fai’aki pe ‘ene tu'utu'uni fakaaoao. ‘Oku fakamahino mai foki ‘e he founga ko’eni ‘a e mavae ‘a e founga ngāue mo e Lao moe founga ‘oku tataki 'aki hotau fonua pea kuo hoko ia koe kakano ‘o e fua fatongia ‘a e Pule’anga lolotonga.
'Oku mahino foki na'e hoko 'a e totongi ko'eni 'oku lolotonga folau 'a e Pule Le'ole'o (Acting General Manager) 'o e Tonga Tourism Authority Ownen Pau'u ki Nu'usila pea kuo mahino mai foki kuo 'osi tu'utu'uni ke malolo 'a Pau'u mei he le'ole'o 'i he lakanga ni kae fetongi ia 'e he ki'i finemui ko Mana Kite pea ko Mana Kite na'e fakamo'oni 'i he sieke ko'eni 'o totongi 'a e Pa'anga kia 'AKosita Lavulavu mo e 'Unuaki 'o Tonga.
Ko e fakaikiiki 'ena 'o e totongi na'e fakahoko kia 'Akosita Lavulavu mo e kau tame'a 'a e 'Apiako 'Unuaki 'o Tonga:
Summary of Flights per week
Welcoming and Farewell International Flights
Date Invoice # Amount($)
July
13th -17th 10 $2,600.00
20th-24th 11 $2,200.00
27th-31th 14 $2,200.00
August
3rd-7th 15 $2,200.00
10th-14th 16 $2,200.00
17th-21st 17 $2,000.00
24th-28th 18 $2,200.00
31st Aug- 4th Sept 19 $2,200.00
September
7th - 11th 23 $2,200.00
14th-18th 24 $2,200.00
21st-25th 25 $2,200.00
28th Sept-2nd Oct 26 $2,000.00
October
5th-9th 27 $2,800.00
12th-16th 28 $1,600.00
19th-23rd 29 $2,000.00
26th-30th 30 $2,000.00
November
2nd-6th 31 $2,200.00
9th-13th 32 $2,200.00
16th-21st 33 $2,600.00
23rd-27th 34 $2,600.00
30th Nov-4th Dec 35 $2,400.00
December
7th - 11th 36 $3,000.00
14th-18th 37 $3,400.00
Total $53,200.00
‘Oku toe fehu’ia heni pe ‘e malava ‘e he Pule’anga ko’eni ‘o ta’ofi nai ‘a e founga ngāue faka-papeliane ko’eni pe ‘ikai.
