Ngali toe Foki ‘a Lavulavu ki he Potungaue Ngaahi Ngaue Lalahi ^Featured

Ko e tu’utu’uni ko’eni na’e fakahoko pea talaki faka’ofisiale ‘e he Palemia ‘i he ‘aho 27 ‘o Novema 2015 pea na’e mahino ‘e kamata lau mei he ‘aho tatau ‘a e mavahe ‘a ‘Etuate Lavulavu mei he Potungaue Ki he Ngaahi Ngaue Lalahi. Kaikehe ko e lava ‘eni ‘a e uike ‘e 3 pea koe lau ‘aki ‘eni ke mahina ‘e taha ‘a e tu’utu’uni ko’eni ka ‘oku mahino mai he ‘oku te’eki ke mavahe ‘a Lavulavu ia mei he Potungaue ni.

Fakatatau kiha fakamatala falala’anga mei he Potungaue ‘oku kei ‘ofisi pe ‘a Lavulavu ‘i he Potungaue Ngaahi Ngaue Lalahi ‘o a’u mai ki he ‘aho Monite ko hono 21 ‘o Tisema 2015. Fakatatau ki he fakamatala mei he Potungaue na’e fakamahino mai talu ‘a e fakahoko ‘a e tu’utu’uni ‘a e Palemia mo e mahino mai ‘e nofo ‘a e Potungaue ko’eni ‘i he malumalu ‘o e Palemia pea koe mahino ia na’e nofo mai ‘aki ‘ehe Potungaue.

‘I he taimi tatau foki na’e kei femou’ekina ‘a e Minisita ‘Etuate Lavulavu ‘i he’ene hopo fekau’aki mo hono tukuaki’i ia ki he ngaue hala mo ta’efakalao lolotonga ‘e Fili Fale Alea 2014 ‘a ia na’e lele ‘i Vava’u he meimei uike ‘e 3 ‘o kamata mei he ‘aho 25 ‘o Novema kimu’a ia pea fakahoko ‘e he Palemia ‘ene tu’utu’uni.

Na’e talu foki hono fakahoko ‘o e tu’utu’uni ko’eni mo e me’a pe ‘a e Minisita ‘i Vava’u pea koe ‘ene toki foki mai ‘eni ki Tongatapu pea mahino mei heni ‘oku ne kei ‘Ofisi pe he Potungaue Ki he Ngaahi Ngaue Lalahi (MOI).

Na’e fakahoko foki ‘a e laaulea mo hono fehu’ia ‘a e tu’unga fakalao ‘o e tu’utu’uni ko’eni pehe foki ki hono ivi ‘e malava fakahoko ‘aki ‘o fakatatau mo e Konisitutone pehe ki he Lao ‘o e fonua. Ko’eni kuo mahino mai ‘oku te’eki ke ngaue ‘a e tu’utu’uni ko’eni ‘o fakatatau ki he me’a ‘oku ho’ata mai he taimi ni mo e ngaahi fakamatala ‘oku ma’u mai mei he loto’i Potungaue.

‘Oku malie he ‘oku mahino mai mei he fakamatala kuo ma’u kuo fakaha ‘e he Minisita maloloo ‘o e Potungaue ni kuo ma’u e fekau mahino mei he Palemia ‘e kei hoko atu pe ‘i hono tataki ‘o e Potungaue ‘a ia ‘oku hoko ai ‘a e puputu’u mo e hoha’a lahi ‘i he kau ngaue.

‘I he taimi tatau ‘oku tu’u telinga ‘a e tokolahi ‘o e kakai ‘o e fonua ki he ‘amanaki ke a’u ki he mahina ko Sanuali pe ‘e malava ke fakahoko ‘a e tu’utu’uni ke fakangata ‘a e vahe ‘a Lavulavu ‘o fakatatau ki hono tautea. ‘Oku mahino pe foki ‘oku fepaki ‘a e tu’utu’uni ko’eni mo e Kupu 2 ‘o e Konisitutone ‘a ia ‘oku ne ta’ofi ke ngaue fakatamaio’eiki ha taha ‘i he fonua.

‘Oku malie foki ‘a e kaveinga ni pea ‘oku fai hono muimui’i he ‘oku fiema’u ke ‘ilo ‘a e kakai ‘o e fonua ki he ngaahi tu’utu’uni ‘oku ne tataki ‘a e anga hono fakalele ‘o e fonua mo ‘ene kaungatonu ki he kakai.