Fekau’i ‘e Lavulavu ‘a Maile Niulala ke Fakamahu’inga’i Loi ‘i he founga Kākā ‘a e Ngaahi Me’angaue Tomifā Paea Featured
Ngaahi Me'angaue 'a e Vava'u Construction 'a Tomifā Paea
Nuku’alofa, 27 Novema 2015. Kuo ma’u ‘e he ongoongo ni ‘a e tatau ‘a e tohi ‘a e Pule ‘Enisinia ‘a e Potungaue Ngaahi Ngāue Lalahi Malie Niulala ki he ‘Eiki Minisitā Pa’anga ‘o fakahā kiai ‘a e mo’oni hono fekau’i fakamalohi’i ia ‘e he Minisitā ‘Etuate Lavulavu ke fakamahu’inga’i loi mo kākā ‘a e ngaahi me’angaue ‘a Tomifā Paea ke fakatau ‘e he Potungāue ‘a e Ngaahi Ngāue Lalahi.
Fakatatau ki he tohi ‘a Niulala ‘a ia koia ‘oku pule he va’a ‘Enisinia ‘a e Potungaue ‘i he ‘aho 19 ‘o Nōvema ki he ‘Eiki Minisitā Pa’anga ‘Aisake Eke na’a ne fakahā ai na’e fekau’i ia ‘e ‘Etutae Lavulavu ke ne fakahoko hono fakamahu’inga mai ‘o e ngaahi me’angāue ‘a e Kautaha Vava’u Construction ‘a Tomifā Paea ‘a ia ‘oku tau mo fokotu’u ‘i Poutaha.
Na’e ‘alu foki ‘a Niulala ‘o fakahoko ‘a e ngāue ni pea na’a ne foki mai mo’ene lipooti ‘oku hā ai koe misini pe ‘e taha ‘oku kei ngāue pea ko hono mahu’inga fakakatoa ‘o e misini ko’eni fakataha mo e toenga ‘o e ngaahi misini ‘a e Vava’u Construction ‘a Paea ‘oku ma’ulalo hifo ia ‘i he pa’anga ‘e 100.000 (tahakilu).
Na’e toe fekau’i ‘e he Minisitā Lavulavu ‘a Niulala ke foki ‘o toe fakahū mai ‘a e lipooti fo’ou pea ‘ai ‘a e mahu’inga ‘o e ngaahi misini ke pa’anga ‘e 1,000,000 (taha miliona). Na’e foki heni ‘a Niulala pea fakahū mai ‘a e lipooti fo’ou koe pa’anga ‘e 1,007,000 (tahamiliona fituafe) ‘o fakatatau mo e fiema’u ‘a e Minisitā.
‘Oku ‘i ai ‘a e fakatumutumu ‘i he founga ngāue ko’eni ‘a e Minisitā ‘a ia ‘oku lahi ai ‘a e longoa’a ai ‘a e fonua ni pea ‘oku mahino mai foki ‘oku ‘ikai ha teteki pe kohano tukupe ta’ofi ‘a e founga ngāue fakapapeliane mo hala ko’eni ‘a e Miniistā. ‘I he taimi tatau ‘oku ‘ikai pe ke fakahoko ‘e he Palēmia ha ngāue ki he Minisitā loi, kākā mo ongongata’a ni pea ‘oku tu’u fehu’ia ai ‘a e falala’anga ‘a e Pule’anga ko’eni he taimi kotoa.
‘Oku lolotonga ‘i Vava’u foki ‘a Lavulavu ‘i he’ene hopo mo Dr. Viliami Uasike Latu fekau’aki mo hono tukuakai’i ia ki he’ene ngāue hala mo totongi fakafufū lolotonga ‘a e Kemipeini ki he Fili Fale Alea 2014. ‘Oku ma’u foki ‘e he ongoongo ni ‘oku nofo pe foki ‘a Lavulavu ‘i Vava’u ‘i he Hotele Puataukanave ‘o Tomifā Paea pea ‘oku ‘ikai puli ‘a e felātani ‘i he vā ‘o e ongo tangata ni.
‘Oku ‘i ai mo e fifili pe koe pa’anga nai ‘e fiha ‘oku ma’u ‘e Lavulavu meia Tomifā Paea kapau ‘oku tu’ulāhoko ‘a e fakatau ko’eni makatu’unga ‘i he fakamahu’inga loi mo kākā ko’eni kuo tu’utu’uni ‘e he Minisitā ke fakahoko. Ko e hā nai ha ngāue ‘e fakahoko ‘e he Minisitā Pa’anga’Aisake Eke fekau’aki moe si’i tautapa ‘a Maile Niulala.
‘Oku mahino mai foki na’e tuku mai ‘e he ‘Ofisi Palemia ‘a e Ongoongo Tukuatu (Press Release) ‘o fakatonuhia’i ‘a e fo’i kākā ko’eni ka ko’eni kuo fakamo’oni’i mai ‘e Maile Niulala na’e fekau’i ia ke fakahoko ‘a e ngāue kākā mo loi ko’eni makatu’unga he’ene talangofua ki he tu'utu’uni ‘a e Minisitā.
‘Oku hā foki mo e hahanu ‘a Niulala he kuo ‘ave hono ongoongo he mitia fekau’aki moe ngaue ko’eni ka ko ‘ene fakahoko pe ‘a e tu’utu’uni ‘a e Ministā.
