‘Oku ‘ikai poupou ‘a Vava’u 16 ki he Kākā mo e Faihala 'a Lavulavu, ^Featured

‘Oku ou faka’apa’apa mo fakahoko atu he tohi ni ke fakamahino ki he kakai ‘o Tonga ni kotoa ‘oku ‘ikai ke poupou ‘a e Vāhenga Vava’u 16 ki he kākā, kai pa’anga mo e ngāue hala’aki ‘o e mafai. ‘Oku mau fiema’u foki he taimi tatau ke mahino ki he Palēmia ‘oku ‘ikai kemau poupou ki he ngaue hala ‘a ‘Etuate Lavulavu he kuo mau maama mo ako pea 'oku mau lotu.

‘Oku mau ongo’i maa mo’oni pea ‘oku mau ‘ilo ko e kakai ‘oku telefoni ki he felāfoaki ‘o poupou ki he pango mo e loi ‘a e Minisitā ko’eni ko hono fāmili ofi pe mo hono kau poupou 'oku nau lele kuikui mo ofi kiate ia pea ‘oku ma’u ha’anau paku’i mā mei he Ministā kākā lahi ko’eni.

‘Oku mau faka’amu ke fakatokanga’i ‘e he fonua koe tokolahi taha ‘o e Vahenga Vava’u 16 na’e ‘ikai fili ia kia ‘Etuate Lavulavu pea na’a nau fili ki he kau kanititeiti kehe ‘a ia koe meimei peseti ia ‘e 70 ‘o e Vahenga 16 na’e fili kehe.'Oku tokolahi 'a e kau Faifekau, kau Ako, kau Tauhifonua, kau Mateaki mo 'Ofa Fonua, kau matapule, kakai mamahi'i me'a moe kakai masiva 'i homau vahenga pea 'oku 'ikai pea he'ikai kemau muimui mo poupou ki ha me'a 'oku hala mo 'ikai totonu.

‘Oku mau faka’amu ange mai ke ‘ilo’ia mai ‘e he kakai ‘o e fonua ‘a ‘emau ta’elata ‘i hono tukulalo’i mo faka’aluma’i ‘aki kimautolu ‘a e kākā homau fakafofonga pea ko hono mo’oni ‘oku mau loto ke fakahoko kiate ia ‘a e pule ‘a lao pea tuku ki tu’a he ‘oku ‘ikai tui ‘a e kakai homau vahenga ki he faihala.

‘Oku mau ongo’i hono me’angaue’aki kimautolu ki he’ene lelei fakafo’i tuitui pea kuo mau fanongo mo ‘ilo mei he letiō ‘a e lipooti ‘a e ‘atita ‘o ‘ilo lelei mei ai ‘ene ngāuehala ‘aki mo hono mali ‘Akosita Lavulavu mo hono foha ko Paea Lavulavu ‘a e pa’anga ‘a e fonua. 'Oku 'ikai lau kiai 'a e ngaahi faihala kehekehe pea 'e po'uli mo 'aho 'oku te'eki ke 'osi hono fakalau.

Na’a mau pehe koe maka ‘oku ta’e totongi ki he’ene tanu hala ka ta koaa ‘oku tu’umalie tokotaha pe ia mo hono famili. ‘Oku ‘afio hifo ‘a Sihova kihomau loto pea 'oku ‘ikai temau poupou’i ‘a e kovi.

Faka’apa’apa Atu
‘Ofa Fonua
Vava’u 16