Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

"Fokotu'u Ke Fakafisi 'a 'Uhila Liava'a He Vave Taha": Clive Edwards Featured

'Uhila Liava'a 'Uhila Liava'a

Nuku'alofa, 24 Sune 2015. 'Oku 'oatu 'i lalo 'a e tatau 'o e tohi 'a e Minisitā Lao Malōlō Clive Edwards ki he Sea Lolotonga 'o e Poate 'a e Kau Talēkita Tonga Forest Products Limited 'Uhila Liava'a fekau'aki mo e ngāue na'a ne fale'i ki he Kapineti ke fakahoko ki he Poate Tonga Forest Products. 'Oku fokotu'u atu ai foki 'i he tohiu ko'eni ke fakafisi leva mei he fatongia.

23 Sune, 2015

‘Uhila Liava’a
Sea Poate Kau Talekita TFPL
Tokomololo
Tongatapu

Tangata’eiki,

‘Oku ou faka’apa’apa mo fakahoko atu ‘a e tohi ni mo ‘eku hoha’a fekau’aki mo e tukuaki’i mamafa kuo ke fakahoko fekau’aki mo e ngaahi ngāue hala tokua na’e fakahoko ‘i he Kautaha Tonga Forest Products Limited. Na’a ku toki foki mai mei Nu’usila pea na’a ku lau ho’o tohi ki he Palēmia ‘o makatu’unga mei ai ‘a e pepa (submission) na’e fakahū atu ‘e he Palēmia ki he Kapineti ‘o fokotu’u atu ai ‘a e ngaahi me’a lalahi ‘e fā ke fakahoko ‘e he Pule’anga.

1.    Ke fakahū Pilisone ‘a David Edwards ko e Sea Malōlō Poate Kau Talēkita TFPL mo Glenda Hiyao ko e Pule Pa’anga Malōlō (Finance Manager).
2.    Ke fakahoko ha tohi kumi koloa ki he ‘api nofo’anga ‘o e tokoua ko’eni.
3.    Ke faka’ilo kinaua ki he fakamatala loi fakapa’anga moha toe me’a kehe pē fekau’aki mo e TPFL
4.    Ke ta’ofi kinaua ke ‘oua tena to e folau ki Tu’apule’anga.

Lolotonga ‘ema ‘i ‘Okalani mo David kuo ma’u ange ‘a e ngaahi fakamatala ko’eni mei hoku foha ko William Edwards ‘oku loea fekau’aki mo e tukuaki’i ko ‘eni na’a ke fakahū ki he Palēmia mo e Kapineti. ‘Oku ou fie fakahā atu heni kiate koe kapau na’e ‘ia ha momo’i ngāue hala na’e hoko na’e mei malava pē ‘a David ia kene nofo ‘i Nu’usila he ‘oku ‘i ai homau ‘api ai pehē ki he ’api ‘o e famili hono mali. Na’e fie foki vave mai ‘a David ke tali ‘a e ngaahi tukuaki’i hala ko’eni kuo ke fakahoko.

Kuo tukuange ‘a e ongoongo tukuatu (Press Release) mei he ‘Ofisi Palēmia makatu’unga ‘i ho’o lipooti ta’e mo’oni mo fakamahamahalo na’e fakahoko pea ‘oku ‘i iai ‘a e maumau lahi ‘i he ngāue ta’e fakapotopoto kuo ke fakahoko. Na’e mole ke mama’o ha ‘amanaki ‘e taha ‘e malava ke ha’u ha fa’ahinga fakanāfala pehē ni mei ha tokotaha ‘oku taku tokua ‘oku falala’anga mo matu’otu’a ‘i he fatongia ‘o hangē ko koe.

‘I he ‘aho na’e malōlō ai ‘a e Pule Pa’anga (Finance Manager) malōlō ‘a ia na’e malōlō ‘a David ia he mahina ‘e fā kimu’a ai, na’e kakato ‘a e ngaahi pepa ngāue ia ‘a e Kautaha. Na’a ke toki hū mai pē k oe mo ho’o kau Talēkita fo’ou ‘o kamata ‘a e tuli tēvolo ‘o kau ai hono kumi ha fa’ahinga ‘uhinga ke faka’uli’i ‘aki ‘a e ngāue ‘a e tokotaha ko’eni.

Na’e ‘osi e māhina ‘e nima ‘oku te’eki ke mou ma’u ha me’a ‘e taha pea mou fakakaukau ai ‘a koe pē koe Pule lolotonga ke faka’auha ‘a e ngaahi tohi ngāue mo tali totongi na’e kei malu mo hao pē ‘i he Kautaha ‘i he 2015. Ko e ‘u tohi tali totongi na’e fai ai ‘a e fefakamo’oni’aki ‘oku kei ma’u hono tatau pea ‘e toki fakahū atu ia ‘e he loea tene fakahoko hono faka’ilo koe pea ‘oku ‘iate au ‘a e tatau ka ‘oku ‘ikai teu loto ke mole hoku taimi ‘i hono toe ‘oatu kiate koe ‘a e me’a tatau pe.
Ko e me’a ‘e taha ‘oku hā mai ‘i ho’o fakamatala ki he Kapineti ko e ta’etotongi ‘a e tupu (interest) ko e pa’anga ‘e 279,850.59.

Na’a ke tohi ki he Pangikē Fakalakalaka ‘i he ‘aho 28 Mē 2015 pea na’e ‘omai ‘a e tali meia kinautolu ‘oku hala ho’o fakamatala ‘i he ‘aho 2 ‘o Sune 2015 ‘o fakamahino mai ‘oku tonu pe ‘a e lekooti ka ‘oku hala ho’o fakamatala ‘a ‘au. Na’a ke fakahū atu mo e ‘u fika ‘a ‘au pea ke hanga ai ‘o fakapikiki ‘i ho’o tohi ‘o e ‘aho 27 ‘o Mē 2015 ‘a e ngaahi statement of accounts.

Na’a ke ma’u ia mei fē ‘a e ngaahi fakamatala koia kapau kuo ‘osi faka’auha ‘a e ngaahi pepa ngāue ‘a e Kautaha? ‘o hangē ko ho’o fa’ufa’u ‘oku fakahoko. Me’a fakalilifu ko ho’o fai e me’a ‘a e loi.

Ko e ‘osi ‘eni ‘a e mahina ‘e nima ‘a ho’o ngāue ki he me’a ni mo e ‘ikai ke ma’u ha lekooti ‘oha pa’anga na’e mole ‘o tupu mei ai ho’o fa’u ‘a e fo’i tukuaki’i loi ‘e ua.
1.    Faka’auha ‘a e ‘u lekooti fakamatala fakapa’anga
2.    Ta’e totongi ‘a e totongi tupu (interests) ki he Pangike Fakalakalaka

Kuo ‘osi ‘oatu ‘a e ngaahi fakamo’oni kiate ko e kae kei hoko atu pe ho’o vilitaki loi. ‘I he’ene pehē leva ‘oku ou fokotu’u atu keke fakafisi mei he fatongia ‘i he vave taha ‘o makatu’unga ‘i he ‘ikai falala’anga ho’o founga ngāue.

‘Ikai ngata ai kuo fakapale’i koe ‘aki ‘a e ngaahi lakanga ma’olunga ke makatu’unga ai ha’o fakahoko ‘a e ngāue hala pea ke longo ‘o ‘ikai teke toe lea ki he ngaahi me’a hala na’a ke ‘ilo kiai kimu’a si’i pea toki fakahoko hono hilifaki metali koe.

‘Oku ‘ikai ha ofo ai he koe fa’ahinga founga ia 'oku ho'ata mai mei hono tataki 'o e fonua he ngaahi ‘aho ni. ‘Oku ou fakatauange ke kau mai ‘a e ‘Eiki ‘i Tonga pea ke haofaki ‘a e kakai ‘o e fonua mei he fa’ahinga to’onga fakaaoao, ‘afungi mo lototāngia hangē koia ‘oku ke lolotonga fakahoko.

Teu ‘ave ‘a e tatau ‘o e tohi ko’eni ki he mītia pea te tau toki fehā’aki ‘a mui ‘i he founga ‘oku taau mo e to’onga fai ‘oku halatu’u mai ai ho’o founga.

Faka’apa’apa Atu
William Clive Edwards

6 comments

  • Sifa
    Sifa Wednesday, 01 July 2015 12:27 Comment Link

    Ko e taimi ni ia kuo tui e he PM ia e kotoa 'o e ngaahi tataa, kuo PM, Ateni Seniale, Polisi Pule pea mo e Fakamaau Lahi. pea toe pule Fakamaau Lau. Vakai'i fakalelei na'a ku ngali lahi hono tataa koe ai pea mafasia ...

    Report
  • Halataufa
    Halataufa Wednesday, 01 July 2015 00:19 Comment Link

    'Oku mahino pe ia ke tuku ke fai e ngaue ka koe poini heni koe fekau ke fakahu pilisone, tohi kumi kolo, ta'ofi e folau, te'eki 'i ai ha fakamo'oni. 'Oku fefe leva ai 'a e fonua?. Ngali 'e toho 'e he saliote 'a e hoosi ee...

    Report
  • Failo Taufa
    Failo Taufa Tuesday, 30 June 2015 19:16 Comment Link

    Tuku atu pe ke fakahoko e ngaue ke kakato pea te tau 'ilo ai e me'a 'oku mo'oni. Pea 'oku tonu e 'alu 'ae fo'i case ko 'eni he 'e fakaiku pe ki he fakamaau'anga 'o toki vete mei ai.

    Report
  • Sunia Fili
    Sunia Fili Saturday, 27 June 2015 03:34 Comment Link

    Kuo taimi ketau tukuatu aa e to'utangata koeni kenau penisoni aa mo e fakapiko.
    Na'e kau 'a Liava'a i he Hotel Dateline, fakalanga'ulu 'ene founga ai. Kuo sea eni he pisinisi vaota paini mei 'Eua, kuo u tui ko e fakaanga eni kulo ki he fakapaku . Kuo taimi ke tukumai kia au mo e kainga kemau fakalele emau vao'akau. Malo, ofa atu,

    Report
  • Sifa
    Sifa Friday, 26 June 2015 15:39 Comment Link

    Hange 'oku ou ki'i fifili! He ko Uhila na'a ne ai a e Lipooti Atita ke tuli a Vakata mei he Public Enterprise pea mo DPM lolotonga i heena misuse of fund. Koeni ku fili ia ki he sea, 'e fefe leva ene fanga ki'i lipooti pehee? Maalie pea toe Lesoni e fanga ki'i me'a pehe ni e!

    Report
  • Manu Moala
    Manu Moala Wednesday, 24 June 2015 21:55 Comment Link

    'Oi !!! Koe lilo lilo pe kae Kio!, he'ikai ke tanu 'eha taha 'ae mo'oni 'o Puli he koe Fonua na'e Tuku ki Langi. Koe fatongia pe ke fai hono fkma'opo'opo 'ae nga'ahi ngaue kotoa 'ae Pule'anga, he koe Pule'anga 'oe Kakai. "Oku mahu'inga 'ae fekumi kihe Mo'oni, he tene 'omai 'ae mahino kihe Kakai kotoa pe.
    Malo
    "oua 'e Fiu

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top