Kau maki ‘o e feisipuka: ‘E faifai pea pehe ‘e he vale ‘oku poto ^Featured

18 Novema, 2019

‘Etita,

Kataki mu’a kae tu’u atu ‘eku ki’i fakaukaukau fakatu’a ni ‘i ho’o kolomu he ‘oku ‘i ai e me’a ia ‘oku ou fakatokanga’i ‘e au he ngaahi ‘aho ni 'oku mo'oni pea 'oku hoko ‘a ia ‘oku ‘alu ke fakalalahi pea toe fakaoli ange ka 'oku fakatu'utamaki foki.

Ko e me’a pe ‘oku ou hoha’a kiai he ‘oku hange ha manu maumau (hufanga he fakatapu) pea ‘oku fakaloloma he 'oku 'ikai foki ke 'ilo ia 'e he ta'emaa'usia 'oku kovi.

‘Oku ou ‘uhinga heni ‘Etita ki he faingamalie kuo tau lave monu ai ‘i he ta’au ‘o e fakalakalaka mo e tekinolosia ‘a ia ‘oku ui koe mitia fakasosiale kae tautautefito ki he feisipuka (facebook).

‘Etita kuo ‘i ai e kau poto fo’ou ia kuo ‘asi hake ‘o hange koe kau maki mei he hahake ‘i he feisipuka pea ‘oku nau lea mai mo fakahoko ‘a e ngaahi to’onga ‘a e kakai ngaue, taukei mo ako pea na’e tafe honau pupuha he kalusefai mo e feinga ke a’usia ‘a e taumu’a mo e tu’unga kuo nau a’usia.

Ko e kau maki ‘o e feisipuka ‘Etita ‘oku fo’ou kiate au he ‘oku nau talanoa he ngaahi kaveinga hange koe politiki, ako, lotu, langa fakalakalaka, tala fakafonua moe ha fua pea ‘oku ‘ai ai ‘a e ‘ikai ke mahino kiate kinautolu 'a e ngaahi me'a 'oku nau lea 'aki ka ‘oku toe fakaoli ‘a e anga ‘a e li honau mata mo e fola honau nima pea hiki’i mo e kemo ia pea ‘oku toe pango ange honau ngaahi puipuitu’a mo ‘enau ngaue ‘oku fakahoko.

‘Oku ‘ikai foki ke kau ha taha ‘i ha taha pea koe tau’ataina foki ia ‘oku tau taa’imalie pea ‘oku mahino pe ‘oku ‘i ai ‘a e lao kene fakangatangata ‘a e tau’ataina koia ka ‘oku mahino mai ‘oku toe popula 'a e kakai tokolahi ia he ngaue ‘a e kau maki feisipuka.

‘Oku nau kapekape tavale pea hange tokua ‘oku nau laukau’aki ‘a e pehe ‘oku nau lava ‘o kape ki he hou’eiki, kau taki, kau ma’u tu’unga mo kinautolu ‘oku ‘ikai kenau tui tatau pea lau kovi ki he kakai mo pehe tokua koia ‘oku fo lalahi taha ‘ene kapekape ‘oku ‘iloa tokua pea lau ai mo hono fefine mo hono tangata.

‘Oku fakaoli ‘Etita he ko ‘enau to’onga ko’eni ‘a ekau maki feisipuka ‘oku ne fakaha mahino mai ai ‘a e ‘ikai kenau si’i maa’usia ‘a ‘enau me’a ‘oku fai pea hange koe fakahua “’oku ‘ai pea pehe ‘e he vale ia ‘oku poto”.

Ko e anga 'eku vakai 'Etita ko e tu'unga fakaako kuopau ke ma'u 'e ha taha pea hoko koha maki feisipuka koe pau ke ta'eakonaki'i, ta'eako, ngaue popula pe faihia tutuku, toutou mali, fakasuva, ta'efaka'apa'apa, fiehaa pea toe ha'oha'omu'a foki.

Ko e me’a ia ‘oku hoko lahi he fonua he ‘aho ni ko e mo’ua e kau ako mo e kakai ngaue malohi he langa e fonua ka e hopo mai e kau maki feisipuka ia ke talamai ki he fonua ‘a e me’a ke fakahoko.

‘Oku tau feisipuka kotoa pe pea ‘oku me’angaue’aki ‘e he tokolahi koe fakafeohi mo fai ai e fevahevahe’aki he ngaahi me’a ‘aonga mo taumu’a lelei pehe ki he tukuhua kae tukukehe ange ‘a e kau maki ‘o e feisipuka he 'oku 'i ai ;enau taumu'a kehe kiai.

Mahalo pe na’a ‘oku hoko e feisipuka kenau kau ai he lau mo lau he kau ka ko hono pango ‘oku lahi ange ‘enau maumau pea ‘oku toe faka’ofa ange he ‘oku ‘i ai mo honau kau muimui kuikui.

Malo 'Aupito,

Hala Taufa

Nuku’alofa