Kamata ngāue ‘a Setita Tui'onetoa ‘i he Letiō Tonga Featured
Setita Millar Tui'onetoa mo e Palemia 'Akilisi Pohiva
5 Sanuali, 2019. Kuo kamata ngāue ‘a Setita Tui’onetoa 'a ia na'e 'iloa ko Setita Millar ‘i he Letiō Tonga ‘o kamata ‘i he uike ni koe uike ‘uluaki ‘o Sanuali 2019.
Na’e tuku atu foki ‘e he ongoongo ni ‘a e fakamatala ki he ‘amanaki ke hiki mai ‘a SetitaTui’onetoa mei Nu’usila ‘o ngāue koe pule ‘i he Letiō Tonga ‘i he mahina ko ‘Okatopa 'o e 2018 ka na’e fakafepaki’i fefeka foki ‘a e ongoongo ko’eni mei he ‘Ofisi ‘o e Palēmia pehe ki he Komisioni Fakamafolalea 'a Tonga ‘o tala ‘oku ‘ikai mo’oni.
Kuo fakapapau'i foki koe kamata ngāue ko’eni ‘a Tui’onetoa ‘i he lakanga koe tokoni pule ‘i he Letiō Tonga ‘o fakatatau ki he fakamatala ‘oku ma’u ‘e he ongoongo ni.
Ko Setita Tui’onetoa na’a ne fakalele ‘a e kautaha ongoongo ‘i Nu’usila koe TNEWS pea na’e matu’aki poupou fefeka ki he Palēmia Samuela ‘Akilisi Pohiva pea hoko ko e me’angāue ‘a e Palemia mo e Paati PTOA ki hono talaki 'enau ngaahi tui mo e ngaue.
‘Oku malava ke faka’uhinga foki ko hono fakapale’i ‘eni ‘o Tui’onetoa ki he’ene ngāue 'osikiavelenga mateaki li'oa ma’a e Palēmia mo e PTOA.
