Malie e faiva ‘a e ongo matu’a ^Featured

20 Fepueli, 2018

Tangata’eiki,

Na’a ku ‘osi tohi atu pe ki mu’a fekau’aki mo e ongo matu’a ni pea ‘oku ou tui ‘oku ‘ikai totonu ketau tuku noa’i ‘a e lea ki he faihala he koe me’a ia ‘oku taukave’i ‘e he Pule’anga ko’eni.

Na’a ku toe fanongo he ongoongo ‘a e Letio Tonga ‘i he ‘aho ni ‘i hono tuku mai ‘a e ongoongo fekau’aki mo e kole ‘a e Minisita ‘o e Potungaue ki he Ngaahi Ngaue Fakalotofonua ‘Akosita Lavulavu ke faka’ata ‘a hono mali ‘Etuate Sungalu Lavulavu kene hoko ko’ene sekelitali (Personal Assistant/PA).

‘Oku ‘ikai ke toe veiveiua ‘a e ‘ikai faka’efika ‘a e fo’i fokotu’u ko’eni neongo kuo ‘osi fakaava ‘e he Palemia ‘a e matapa ‘o e filifili manako (Nepotism) ‘a ia na’a ne malang’i ki mu’a ‘oku ‘ikai taau ‘aki ‘ene fili hono foha ke hoko ko’ene PA.

Na'e toe 'ohake 'i he felafoaki 'a e kaveinga ko'eni pea 'oku mahino lelei mei heni 'oku 'i ai 'a e totonu 'a e kakai totongi tukuhau ke lea ki heni he 'oku 'i ai 'enau tootnu kiai.

Kuo tekeutua atu ki mamani ‘a e fakamotu si’i ‘a e ngaahi mafihunga hotau Pule’anga pea koe ongo matu’a ko’eni ‘oku ‘ikai puli he fonua ni hona hisitolia.

‘Oku teu ‘ena hopo ko hono tukuaki’i ki hono kakaa’i ‘a e pa’anga ‘a e fonua ki he’ena ‘apiako ‘a ia nae laukilu pea kuo na ‘osi kole ki he Potungaue Ako ke totongi faka kongokonga.

'Oku lolotnga 'i ai moe ngahai mo'ua 'oku te'eki ke totongi pea lolotonga ia kuo hoko mai mo e fo’i fokotu’u ko’eni ‘a ia ‘oku mahino ko hono fokotu’utu’u mai ‘eni ‘a e mala'e faiva ‘e he ongo me’a ni.

‘Oku mahino mai foki ‘oku ta’efiemalie ‘a e kau ngaue ‘a e Potungaue ni ki he faitu’utu’uni ‘a e motu’a tangata ‘a ia ‘oku ou fa’a ngaue ‘aki pe koe Lavu Tangata ke faingofua mo mahino ‘i he Potungaue lolotonga ia ‘oku ‘ikai hano tu’unga ai.

‘Oku ou toe ma’u mo e fakamatala falala’anga ‘oku ‘ai ke fakahoko ‘a e tohi tangi ‘a e kautaha ‘a e kau ngaue faka-pule’anga (PSA) ki he komisoni 'a e kau ngaue faka-pule'anga (PSC)  ke ta’ofi ‘a e nga’unu ko’eni ‘oku fai ‘e he ongo Lavu.

‘Oku ou faka’amu ‘Etita ke fakahoko leva ha ngaue ki he ongo Lavu he koe lahi ‘o e ngaahi nga’unu kuo na fakahoko ‘i hona hisitolia ngaue na’e iku ki he palopalema.

‘Oku mahino mai foki ‘oku na lolotonga folau ki ‘Aositelelia tokua koe a’ahi ki he kau toli lolotonga ia ‘a e faingata’a ‘ia ‘a e fonua he saikolone ko Gita kuo na heka vakapuna kalasi ‘uluaki kinaua mei he tukuhau ‘a e kakai.

‘Oku ou ‘amanaki ‘e ‘a a ‘a e fonua ni ‘o sio ki he fa’ahinga sipinga ko’eni pea fakangata na’a iku ‘o pehe ‘e he ongo matu’a ni ia ‘oku sai pe ‘ena faiva ‘oku fakahoko.

Faka’apa’apa Atu,

‘Eliesa Fifita

Tufuenga

Kolomotu’a