Fifili ki he kau 'ofa fonua 'oku lau ^Featured

2 Fepueli, 2018

Tangata’eiki,

Neu fanongo ‘i he 87.5FM hono fakamafola mai ai ‘a e lea ‘a Tu’i Uata ki he kau inukava fekau’aki mo ‘ene fehu’ia pe koe “taliui ki he Tu’i he ‘oku ‘i ai ha’ane pa’anga?.”

Na’e ‘osi pea na toe faka’eke’eke mo e fefine he letio 87.5 ai pe ‘one toe fakahalaki ‘ene lea ‘i he’ene faka’uhinga.

Ko e me’a eni ‘oku fa’a lau ‘e he kau leka koe fana’i pe ‘e ia hono la’i va’e.

Ko e taha ‘o e ngaahi me’a na’e fakamamafa’i ‘e he Minisita fakapone’i ta’efili ‘e he kakai koe taliui ki he kakai masiva mo totongi tukuhau.

'Oku toe fehu'ia pe ko hai 'oku taui kiai 'a e Minisita ko'eni? koe kakai pe ko 'Akilisi na'a ne fili ia.?

 ‘E lava nai ke ‘uluaki hanga ‘e he Minisita ‘o kamata’i mai e ‘ofa ‘i he masiva ‘aki ‘e he totongi e mo’ua ‘enau kautaha vaka ki he pule’anga?

Teu meimei ofiofi ki ha fakakaukau’i ha’aku tui atu ki ai kapau te ne fai e me’a koia kae tuku e kumi tu’umalie aki e hingoa ‘o e kakai masiva.

‘I he tengetange ko eni ‘a e Tangata’eiki Palemia ‘oku fakaloloma he ko hotau Palemia. ‘Oku toe fakaloloma ange sio atu ki he ni’ihi kau ai ‘a e Minisita ‘ofa masiva ko'eni ‘oku hange mai ha samaletani ‘enau fotu mai koe mata’i fie tokoni ki he Palemia.

‘I he taimi tatau ‘oku nau takitaha e ngaahi fu’u housi ‘o si’i komo e tukuhau ‘a e fonua.

‘Ofa ‘e loto lahi e kau ngaue fakapule’anga he Potungaue ‘e taha ‘a e pule’anga ‘oku lolotonga tau ki ai ‘a e taha ‘o e ngaahi fu’u housi pea ‘oku toe manga ua atu ki he Potungaue ‘e taha.

‘Oku ‘i ai ‘a e faka’amu koe ngata’anga pe ia ‘ene mangamanga na’a manga lahi ka tau ‘auha.

Teu toki hoko atu.

Hala Taufa’ahau