‘E fakatau nai ‘e he Pule’anga ‘a e Hotele Little India? ^Featured

‘Oku mahino foki ki he ongoongo ni koe hotele ko’eni na’e tu’uaki fakatau pea na’e ‘osi ‘i ai mo e tokotaha pisinisi ‘i Tonga ni na’e osi papau kene fakahoko ‘a e fakatau ko’eni pea na'e tali 'eni 'e he Kapineti pehe ki he Potungaue Fonua kae fokifa kuo toe fai hono ta’ofi koe’uhi he na’e feima’u ‘e he Palemia mo e Pule’anga kenau fakatau ‘a e hotele ni.

'Oku toe ma'u pe foki 'e he ongoongo ni ia mo e fakamatala ne 'osi fakahoko 'a e fakataha ia 'a e Palemia mo pule 'o e hotele ni 'i Novema 2017 fekau'aki mo e fakatau ko'eni..

‘Oku malie he ‘oku fepaki ‘eni ia mo e fakaukau ‘o e public-private sector partnership ‘a ia ko hono faka’ai’ai ke mo’ui ‘a e sekitoa taautaha pea ke fakaivia kinautolu kenau tokoni ki hono langa ‘o e ‘ikonomika ‘o e fonua.

‘I he tafa’aki ‘e taha ‘oku fai hono fehu’ia ‘a ‘uhinga mo e taukei fakalele hotele 'a e Pule'anga kapau koe mo’oni ‘e fakahoko ‘a e fakatau ko’eni lolotonga ia ‘oku ‘i ai ‘a e ngaahi fiema’u vivili ia ‘a e fonua ‘oku toe mahu’inga ange.

Na’e fakahoko foki ha faka’eke’eke ‘a e ongoongo ni ki he kau ngaue ‘a e hotele ni ka na’a nau pehe pe koe mo’oni ‘e fakatau 'a e hotele ka ‘oku totonu ke fahoko ‘a e fetu’utaki ki he pule koe fefine ‘Initia ko ‘Anita Singh.

Na’e fakahoko ‘a e fetu’utaki ‘a e ongoongo ni ki he Pule ‘o e Little India ko ki he Lords Mobile pea na’e ‘ikai ke loto ‘a Anita ke ‘omai ha’a ne lau fekau’aki mo e kaveinga ni.

Ko e fakamatala kuo ma’u e he ongoongo ni na’e ‘osi ‘i ai ‘a e mahu’inga ke fakatau ‘aki ‘a e hotele ni ‘e hetokotaha na'e teu kene fakahoko 'a e fakataui ka ‘oku ma’olunga ange ‘a e mahu’inga ia ‘oku tuku mai ‘e he Pule’anga.

'Oku toe fehu'ia foki mo e kau taki 'i he Pule'anga 'oku nau tu'u vaha'a he palani fakatau ko'eni pea koe ha 'enau lelei fakafo;ituitui 'e ma'u mei ai tukukehe ange 'a hono fehu'ia 'a e lelei fakalukufua ki he fonua.

‘Oku hokohoko atu pe hono muimui’i ‘e he ongoongo ni ‘a e kaveinga ni.