‘Oku ‘ikai koe to’o e mafai ka koe fa'ao pe Featured
‘Oku ‘ikai koe to’o e mafai ka koe fa'ao pe
Kolomotu’a
Nuku’alofa
27 Novema, 2017
Tangata’eiki,
‘Oku ou kole keu fakamaumalu atu he tala malu ‘o e fonua mo e lotu kae ‘ata ke fakahoko tau’ataina atu pe ‘eku fakaukau.
‘Oku ou fakamalo atu kia Dr. Pohiva Tui’onetoa he’ene fakamahino mai ‘a e fiema’u ‘a e PTOA mo fakatonutonu mai ‘oku ‘ikai kenau feinga ke to’o e mafai ‘o e Tu’i.
Ko hono fakamahino mai ‘eni ‘e Tui’onetoa ‘i hano faka’eke’eke ia ‘e he Letio ‘a Katalina Tohi ‘i he uike kuo maliua atu.
Ko e maumau pe ‘ene fakamatala he na’a ne (tapu ange mo ia) sapi’i ‘aki pe hono va’e hema hono va’e mata’u fakatatau ki he’ene fakamatala.
Ta koaa ko e taumu’a ia ‘a e PTOA ke ‘oua ‘e to’o ‘a e mafai ‘o e Tu’i kae fa'ao mai pe ‘a e mafai ke fili ‘ene kau fale’i, fili ‘o e Komisiona Polisi pea mo e ‘Ateni Seniale ke ‘omai ia ke fakahoko ‘e he Kapineti.
Ko e me’a na’e fakamatala mai kiai ‘a Tui’onetoa ko e to’o ia ‘o e mafai ‘o e Tu’i pea ‘oku ou kei fifili pe koe fa’ahinga faka’uhinga fe ia ne fakahoko mai ‘e he Toketa Tohitapu ko’eni.
Ko e anga ‘a e fakakaukau ma’ulalo ‘a e motu’a ni ‘oku ‘ikai koe ‘osi ‘eni ia ia e fokotu’utu’u ‘a e PTOA ‘oku ‘omai ‘e Tui’onetoa ka ‘oku unga mai mei mui ‘a e me’a lahi.
‘Oku tau lotu pe ke kei hoko a Tonga koe fonua malu mo monu’ia.
Faka’apa’apa Atu,
Mate Ma’a Tonga
Kolomotu’a
