Ke foaki ‘e he Pule’anga konga ‘o e mala’e tapulu ma’ae kau va’inga Mate Ma’a Tonga Featured
Talēkita ‘o e kautaha ko e Meletoni Fresh Fruits ‘Etoni Afu
21 Nōvema, 2017. Kuo fakahā ‘e he talēkita ‘o e kautaha ko e Meletoni Fresh Fruits ‘Etoni Afu 'a e anga 'ene fakakaukau mo 'ene tui 'oku totonu ke foaki ‘e he Pule’anga Tonga ‘a e konga ‘o e mala’e tāpulu ‘i Popua ma’a e kau va’inga ‘a e Mate Ma’a Tonga.
Ko hono fakahā ‘eni ‘e ‘Etoni Afu ki he ongoongo ni ‘i he pongipongi ‘o e ‘aho ni mo ‘ene faka’amu ke a’u atu hono le’o ki he kau ma’u mafai 'i he funga 'ene fakakaukau tau'ataina pea 'oku makatu'unga pe 'eni 'i he'ene fiefia mo e mamahi'i fonua.
Ko e kautaha Meletoni Fresh Fruits foki ‘oku nau kau 'i he taaimu’a hono siponisoa fefeka ‘a hono fakamafola mai ‘o e ngaahi va’inga ‘a e Mate Ma’a Tonga ke mamata kiai ‘a e kakai ‘o e fonua ‘i he lolotonga ko’eni ‘a hono tau’i ‘o e ipu ‘a mamani ‘i he mala’e ‘akapulu liiki.
Fakatatau ki he fakamatala ‘a ‘Etoni Afu, ‘oku ne tui 'oku totonu ke foaki ha konga ‘apikolo ki he tokotaha kotoa ‘o e kau va’inga Mate Ma’a Tonga ke fakahounga’i ‘aki ‘enau mateaki’i ‘a e fonua he ‘oku mahino mai ‘e ‘ikai malava ‘e he fonua ke totongi fakapa’anga kinautolu neongo ko'enau pole pe kenau si'i foki mai 'o fakafofonga'i 'a honau fonua tupu'anga mo 'enau matu'a.
‘Oku tui 'a ‘Etoni Afu ko e feitu’u lelei taha 'i he anga 'ene fakakaukau ke to’o mei ai ‘a e ngaahi ‘apikolo ko’eni ko e mala’e tāpulu ‘i Popua he koe 'elia 'oku taumu'a ki he sipoti.
‘I he hoko atu ‘a e fakamatala ‘a ‘Etoni Afu ‘a ia ‘oku ne fefolau’aki pe ‘i he vaha'a 'o Tonga ni mo Nu’usila ‘i he’ene pisinisi ‘oku ta’e hano tatau ‘a ‘enau ongo’i ‘enau laukau ‘aki honau Tonga ‘i he lavame’a ‘a e timi Mate Ma’a Tonga pea ‘oku totonu ke fai ‘e he fonua ha me’a ke faka’ilonga’i’aki.
"Kapau ‘e foaki ‘a e konga ko’eni ke takitaha langa ai ‘a e kau va’inga Mate Ma’a Tonga he 'oku 'i ai 'enau pa'anga tenau toe lava kenau ‘omai ha kau ‘inivesitoa mei muli 'o ngāue'aki honau tu'unga 'iloa 'i he sipoti ke tokoni ki hono fakalakalaka’i ‘a e ‘elia ko’eni pea toe fakalakalaka'i 'o fakataumu’a foki ki he ngaahi sipoti kehe pe pe kau ai pe moe tāpulu," ko e lau ia 'a 'Etoni Afu ki he ongoongo ni.
‘Oku tui a ‘Etoni Afu ‘oku tau’atāina pe ke ‘oatu ‘ene fakakaukau he ‘oku ‘alu ma’u pe ‘o mamata ‘i he tau 'a e Mate Ma’a Tonga ‘i Nu’usila pea ‘oku ne ongo’i ‘e ‘ikai malava ke totongi faka-pa’anga ‘a e lavame’a mo e mateaki ‘a ‘etau fanau Mate Ma’a Tonga ma’a e fonua pea.
Na'e faka'osi 'aki 'e 'Etoni Afu 'a 'ene faka'amu ke fakamahino 'oku mole ke mama'o ha toe 'uhinga kehe ki he'ene fokotu'u ka koe anga pe 'ene fakakaukau 'i he funga 'o 'ene fiefia 'i he lava me'a 'a e Mate Ma'a Tonga pea 'ave ai 'a e fonua ki he langilau.
