Menu
cache/resized/08c0a7e4df7cc3828bd4ac05d0fd2f03.jpg
Paloveape 'o e Uike Matavaka Pikivaka ...
cache/resized/42eeee36d7906494f572f8383fc5e456.jpg
‘Aho 6 Sepitema, 2017 Palesiteni / Kau ...
cache/resized/63614fa437cb694b8770470f544a87ea.jpg
“TOURS & TRAVEL AT IT’S BEST IS ...
cache/resized/de22811ba69e150b74276adfe9cd60f1.jpg
S&F Brothers (Car Dealer & Accounting ...
cache/resized/c5486089fb6fe141100fa93741aee80f.jpg
Vaiola Shop & Cafe  
cache/resized/952d37c5b239f200e4b0a944bfa8cde0.jpg
RED Rapid Engineering Diagnostic Specialize in: ...
cache/resized/4aa5e843d919f2a85363b065c748eef3.jpg
TONGA INTERNATIONAL ACADEMY ACADEMIC ...
Latest News

Na’e ta’efakalao ‘a e fakamo’oni ‘a Tonga ‘i he Aleapau PACER PLUS Featured

Minisita Leipa Pohiva Tui'onetoa mo 'ene CEO Le'ole'o 'Anisi Bloomfield koe tangata fale'i ke fakamo'oni 'a Tonga 'i he PACER PLUS Minisita Leipa Pohiva Tui'onetoa mo 'ene CEO Le'ole'o 'Anisi Bloomfield koe tangata fale'i ke fakamo'oni 'a Tonga 'i he PACER PLUS

31 ‘Aokosi, 2017. Na’e ‘i ai ‘a e filili mo e hoha’a ‘a e ni’ihi ‘o e fonua ki he tu’unga fakalao ‘o e fakamo’oni ‘a Tonga ‘i he Aleapau PACER (Pacific Agreement on Closer Economic Relations) PLUS (Plus New Zealand and Australia).

Ko e Aleapau fefakatau’aki foki ‘eni ‘i he vaha’a ‘o e ngaahi fonua ‘o e Pasifiki mo Nu’usila mo ‘Aositelelia ‘a ia na’e ‘ova he ta’u ‘e 10 ‘a hono alea’i pea toki fakamo’oni kiai ‘a e ni’ihi ‘o e ngaahi fonua ‘o e Pasifiki ‘i he ta’u ni tukukehe ‘a Naulu na’e fakamo’oni pe ia ‘i he 2001.

‘Oku mahino foki na’e ‘ikai fakamo’oni ‘a Fisi, Papua New Guinea pea mo Vanuatu ki he Aleapau Fefakatau’aki ko’eni pea ‘oku makatu’unga pe ia ‘i he ‘uhinga faka ‘ikonomika mo ’enau tui ‘e ‘ikai lelei mo ‘aonga ‘eni ki honau ngaahi fonua he ‘e lahi ange pe ‘a e ngaahi penefiti ‘e ma’u ‘e Nu’usila mo ‘Aositelelia mei he Aleapau ko’eni.

Makehe ange mei he ngaahi lelei ‘e ala ma’u ‘e Tonga ni mei he Aleapau ko’eni mo e ‘uhinga na’e fakamo’oni ai ‘a e Pule’anga, ‘oku fehu’ia ‘a e tu’unga fakalao ‘o 'etau fakamo’oni ki he Aleapau ko’eni ‘o fakatatau ki he’etau Konisitūtone.

‘I he Kupu 39 ‘o e Konisitūtone ‘oku pehe ni hono fakalea-

"‘E ngofua ki he Tu’i ke fai ha ngaahi talite mo e ngaahi Pule’anga Muli ka ‘oku ‘ikai ngofua kene fai ha ngaahi talite ‘oku fai kehe mo e lao ‘o e Pule’anga ni. ‘Oku ‘ikai ngofua ki he Tu’i ke ue’i ‘a e tute ta’eloto kiai ‘a e Fale Alea. ‘Oku ngofua ki he Tu’i ke fakanofo ‘ene kau fakafofonga ki he ngaahi Pule’anga ‘o hangē koe ngaahi anga ‘o e ngaahi Pule’anga".

‘Oku kau pe foki ‘a e aleapau fefakatau’aki (trade agreement) ‘i he talite (trade treaty) pea ‘oku ‘uhinga pehe ‘a e fifili ko’eni ‘o fakatatau ki he fakalea ‘o e Kupu 39.

Kapau leva ‘oku ‘i he mafai ‘o e Tu’i ke fakangofua ‘eni pea ‘oku fehu’ia pe na’e ‘osi fakamafai’i ‘eni ‘e he ‘Ene ‘Afio ketau fakamo’oni ‘i he Talite Fefakatau’aki PACER PLUS.?

Na’e ‘osi hoko foki ‘i he 2015 ‘a e me’a tatau ‘a ia ko e feinga ‘a e Pule’anga ke fakamo’oni ‘i he Konivēsio pe Talite CEDAW ka na’e ‘ikai fakamafai’i mei he ‘Ene ‘Afio pea na’e longoa’a ai ‘a e fonua.

‘Oku ‘uhinga pehe ‘a e fifili ko’eni he na’e fakahoko ‘a e fakamo’oni ‘a Tonga ki he Aleapau pe koe fakataha mo e ngaahi fonua mei he Pasifiki ‘e 9 kehe ‘i he mahina ko Sune ‘o e ta’u ni.

Kaikehe ‘oku fakapapau’i mai mei he ‘Ateni Seniale Le’ole’o na’e ‘ikai fakalao ‘eni pea na’e kau foki ia he konga ‘o e ngaahi fokotu’u na’e tuku atu ‘e he Sea ‘o e Fale Alea ki He’ene ‘Afio ke veteki’aki ‘a e Fale Alea.

Na'e toe fakamahino 'e he 'Ateni Seniale hange koia 'oku ha 'i he'ene fakamatala ki he Matangitonga 'i he 'aho 30 'Aokosi na'e 'ikai ke kumi fale'i ange kiate ia 'a e Pule'anga fekau'aki mo e fakamo'oni ki he talite fefakatau'aki ko'eni.

‘Oku malie ‘a e feinga ‘a CEO Le’ole’o ‘a e Potungaue Leipa ‘Anisi Bloomfield ke faka'uhinga ‘a e ta’e fakalao ‘a e fakamo’oni ko’eni pea pehe ki he ‘ikai mahino lelei ki he Minisita Pohiva Tui’onetoa ‘a e kehekehe ‘o e fakamo’oni (signing) mo hono fakapapau’i (ratification) hange koia na'e fakaha lolotonga 'a e fakataha mo e kau faiongoongo 'i he kongaloto 'o e uike ni.

Ko hono fakama’opo’opo na’e 'ikai fou he founga pea 'ikai fakalao pea na'e 'ikai fai ha kumi fale'i fakalao pe ko hano fakahoko ki he Tu'i.

'I he taimi tatau kuo fakamahino mei he Pule’anga Nu’usila 'a ia 'oku na kau fakataha mo 'Aositelelia ki he Aleapau ko'eni tenau tuku mai ki Tonga ni kenau fakalelei’i ‘a e tu’unga ‘o ‘enau fakamo’oni ki he Aleapau ko’eni.




1 comment

  • Sioeli Kolo
    Sioeli Kolo Friday, 01 September 2017 10:15 Comment Link

    'Aaha, tau sio 'anepo he polokalama 'a e Pule'anga Care-taker kihe nounou fkvesitapolo 'oku ki'i lahilahi ka koe kau tu'u mu'a eni he Pule'anga koeni 'oku nau fu'u ma'uhala 'aupito kihe Pacer Plus pea nau talatala kehe mei he 'Ateni Seniale Le'ole'o. Koe me'a fakalao pea 'oku totonu ke tukuange kihe kau ako Lao ke nau vete mai. Koe ha nai e 'uhinga 'oku 'ikai ke nau fie fakafekiki ai moe kau Toketa Sino 'ihe ngaahi faliunga 'o e Mo'ui Lelei?

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top