Fakatu’utāmaki lahi teu Liliu Konisitūtone ‘a e Pule’anga: Palōfesa Malakai Koloamatangi Featured
Palōfesa Malakai Koloamatangi (Mafua Lulutai), Talēkita ia ‘o e Senitā ki he Ako ki he Pasifiki ‘i he ‘Univēsiti ‘o Massey ‘i Nu’usila.
24 May, 2017. Kuo fakamahino ‘e he mataotao he mala’e Saienisi ‘o e Politikale Palōfesa Dr. Malakai Koloamatangi ki he ongoongo 'a e Letiō Nu’usila ‘e fakatu’utamaki lahi ‘a e teu liliu Konisitūtone ‘a e Pule’anga Tonga.
Ko e fafakafepaki’i lahi ‘eni ‘e Koloamatangi ‘a e fakamatala ‘a e Minisitā Lao Sione Vuna Faka’otusia ‘oku fokotu’utu’u ‘a e Pule’anga ke liliu e Konisitūtone ke fili ‘e he Pule’anga ‘a e ‘Ateni Seniale mo e Komisiona Polisi ‘a ia ‘oku lolotonga ‘i he malumalu ‘o e Tu’i moe Fakataha Tokoni.
Kuo lahi foki hono fakaanga’i ‘a e fokotu’utu’u ko’eni ‘a e Pule’anga pea kuo fakaanga’i ‘e he kau loea mataotao, kau mataotao he mala’e ‘o e Saienisi Politikale, kakai ‘o e fonua mo e ngaahi sekitoa kehekehe 'i he ta'e tui ki he fokotu'u ko'eni 'a e Pule'anga.
‘Oku tui foki ‘a Palōfesa Dr. Malakai Koloamatangi ‘e hoko ‘a e maumau lahi heni he ‘oku mahu’inga ‘a hono faka-palanisi ‘a e mafai pea koe taliui ia mo e ‘ata ki tu’a (accountability and transparency).
‘I he lau ‘a Koloamatangi ‘oku ‘ikai faka’ohovale ‘eni he na’e fa’a ongona pe ‘eni mei he ngaahi fokotu’utu’u ‘a e Palēmia 'Akilisi Pohiva mo ‘ene paati ‘a ia ‘oku hoko he ‘aho ni.
Na'e faka'osi 'aki 'e Koloamatangi 'ene pehē koe feinga ke pule’i ‘a e ngaahi lakanga ni pea mo e nga’unu ke li’aki ‘a e taliui (accountability) koe palopalema lahi ia pea ‘oku ‘ikai ke faka-Temokalati.
Ko Palōfesa Dr. Malakai Koloamatangi koe Talēkita ia ‘o e Senitā ki he Ako ki he Pasifiki ‘i he ‘Univēsiti ‘o Massey ‘i Nu’usila.
