Mole taimi fakaafe konifelenisi (Press Conference) ‘a e Palēmia ^Featured

Na’e fakahoko mai foki ‘a e fakaafe ‘i he ‘aho ni ‘a e Palēmia ki he kau faiongoongo mo e ngaahi kautaha ongoongo kenau kau atu kiha konifelenisi ‘o kaveinga’aki ‘a e teuteu ki he sipoti 2019.

Ko e konifelenisi foki ko’eni na’e teuaki fakahoko ki he paaka lata’anga ‘o e Palēmia ‘i Va’epopua pea na'e hā pe he fetohi'aki 'a e ni'ihi 'o e kau faiongoongo mo e ngaahi kautaha ongoongo 'enau pehe 'oku taka fakapiko.

Na’e fehu’ia lahi foki ‘e he ni’ihi ‘o e kau faiongoongo ‘a e fa’a fakahoko ‘a e ngaahi konifelenisi mo e Palēmia pea 'oku pehe 'e he ni'ihi 'oku fakamole taimi (waste of time) he 'oku iku ke fakamafola pe ‘a e ngaahi me’a ‘oku loto kiai ‘a e Pule’anga pea tuku ‘a e ngaahi konga ‘oku ‘ata kovi ki he Palēmia mo e ‘imisi ‘o e Pule’anga.

Na’e toe ‘ohake foki hono fehu’ia ‘e he ni’ihi ‘o e kau faiongoongo mo e ngaahi kautaha ongoongo ‘a ‘enau ngaahi tohi fehu’i kuo fakahū atu ki he ‘Ofisi ‘o e Palēmia pehe ki he Hou’eiki Minisitā mo e Pule’anga ka ‘oku te’eki pe ke tali mai 'o a'u ki he 'aho ni pea kuo fu’u fuoloa.

Na’e kau foki he hoha’a ‘a e kau faiongoongo mo e ngaahi kautaha ongoongo ‘a e fiemau pe ‘e he Palēmia ha’ane konifelenisi kuo uki mai ki he kau faiongoongo mo e ngaahi kautaha ongoongo kae hili koia ‘oku ne fakafe’atūngia’i ‘a e tau’atāina ‘a e ongoongo ‘o hangē koia ‘oku hoko ki he Komisoni Fakamafolalea ‘a Tonga.

Na’e toe fokotu’u foki ‘e he taha ‘o e ngaahi kautaha ongoongo ke ‘oua ‘e toe talitali tu’u ‘a e fakaafe ‘a e Palēmia pea ‘oua ‘e toe fai ha lava kiai (boycott) pea ke ako aa ‘a e kau faiongoongo mo e ngaahi kautaha ongoongo mei he ngaahi to’onga fakaaoao ‘a e Palēmia.

Na’e ma’u mai foki ‘a e tali mei he ‘Ofisi ‘o e Palēmia ‘o fakahā mai ‘e kau mo e tau’atāina ‘a e mītia (Media Freedom) ‘i he ngaahi kaveinga ‘o e konifelenisi (Press Conference) ko’eni.

Na’e ‘ikai kau atu ‘a e ongoongo ni ki he konifelenisi ko’eni pea 'oku te'eki kau tu'otaha atu 'a e ongoongo ni kiha konifelenisi (Press Conference) mo e Palēmia.

'I he taimi tatau ‘oku toe fehu’ia pe foki mo hono fokotu’u mai mei he ‘Ofisi ‘o e Palēmia ke ‘ohake ‘a e kaveinga tau’atāina ‘a e mītia (Media Freedom) lolotonga ia ‘oku hoko ‘a e ngaahi fakafe’atungia lahi ki he tau’atāina ‘a e ongoongo ‘i he fonua ni.

Kuo kau mai ‘a e ngaahi kautaha ongoongo muli ki hono fakafepaki’i ‘a e ngaahi tu’utu’uni ‘a e Palēmia mo e Pule’anga fekau'aki mo e Komisoni Fakamafolalea 'a Tonga pea kuo a’u ‘a e tala’a ‘a e mītia ki he He’ene ‘Afio.