Nima ‘aki ‘ehe Palēmia ‘a Lavulavu neongo ‘ene ta'efalala'anga ^Featured

 ‘Etita,

Kataki ka e tu’u atu ho’o kolomu ‘a ‘eku hoha’a ki hono kei nima ‘aki ‘e he Palēmia ‘a e kakai ta’efalala’anga he fonua.

Ko Lavulavu ‘oku ‘ikai sola kiai ‘a Tonga ni he na’e halaia ‘i he Fakamaau’anga pea na’e fakamalōlō’i mei he Minisitā mo e Falealea pea na’e toe halaia hono Faka’ilo Faka Fale Alea ‘o kole fakamolemole ‘i Fale Alea pea fanongo kiai ‘a e fonua.

Kuo mahino mai ko Lavulavu ‘oku kau he kau taki ‘i he ngāue ki hono tanu ‘o e mala’e tāpulu ‘oku langa ‘i Popua pea ‘oku mahino mai ‘oku kau he kau konitulekitoa koia.

‘Oku ou hoha’a lahi he ‘oku kau atu e pa’anga tukuhau ‘a e fonua ki he ngāue ko’eni pea teu fakalea pe ‘oku vahe mei ai ‘a e kakai kākā mo faihala ‘o hange ko Lavulavu.

Kuo tuli ‘eni mei he ngaahi Poate ‘a e Pule’anga ‘a e kakai falala’anga pea ako lelei pea kuo mo’ua e Pule’anga he ngaahi fakatonutonu fakalao fekau’aki mo hono fakamalōlō’i e kakai falalala’anga ko’eni kae falala pe ‘a e Palēmia ia ki he kakai kuo mata’ā’ā ‘enau faihala pea kuo fakamo’oni’i ‘o a’u ki he Pule 2 mo e Pule 3 ‘o e fonua.

‘Oku mole ke mama’o ha’aku loto kia Lavulavu ka he’ikai ketau lava ‘o tanu ‘ene ngāue hala kuo fakahoko he fonua ni pea 'oku lahi.

‘Ikai ngata ai ‘oku ‘ikai totonu ketau fakalongolongo he ‘oku tōtu’a ‘a e faihala hotau fonua ni pea kuo me’a noa pea talanoa hua‘aki ‘a e tuku ‘a e lao ki he tafa’aki kae fai tokua e ngaue ia.

‘I he taimi tatau ‘oku malava ke mahino mei heni ‘a e fa’ahinga kakai ‘oku falala kiai hotau kau taki pea ‘oku ‘i ai ‘a e totonu ‘a e kakai ‘o e fonua ke lea he ‘oku ‘i ai ‘a e fakamo’oni mo e ‘uhinga pea ko e pa’anga tukuhau ‘a e fonua ‘oku ngāue’aki.

‘Oku ou fokotu’u atu ki he Fale Pa’anga ke ‘aa homou konga kotoa he koe siana ‘eni kuo toe foki mai ‘o ofi ki he lepa ‘a e fonua pea koe fakangofua pe ia ‘e he Palēmia.

He’ikai ketau ofo ka toe hoko ha me’a heni pea ‘oku ou fakahoko atu ‘a e tohi ni ‘i he ongo’i mo’oni ‘a e hala ‘o e founga ‘oku tataki ‘aki kitautolu mo e ngāue ko'eni 'oku fakakau mai kiai 'a Lavulavu.

Faka’apa’apa Atu,

 ‘Eliesa Fififta

Tufuenga-Kolomotu’a