Mahino pe ‘oku ta’e fakalao ka temau talangofua pe – Poate Fakamafolalea Tonga Featured
'Ahongalu Fusimalohi Sea Poate Komisoni Fakamafolalea 'a Tonga
9 Mē, 2017. Na’e fakahoko he ‘aho ni ‘ehe Poate Komisoni Fakamafolalea Tonga ‘a ‘enau tu’utu’uni aofangatuku ke fakamalōlō’i ‘a e Pule Komisoni Nanisē Fififta mei hono lakanga.
Na’e fokotu’u atu foki ki he Minisitā ‘o e Ngaahi Pisinisi ‘a e Pule’anga Poasi Tei ‘e he Poate ke fakafo’ou ‘a e konituleki ‘a Fififta ka na’e ‘ikai tali ‘eni ‘e he Minisitā makatu’unga ‘i he’ene tui ‘oku ‘ikai fakalao.
Na’e foki leva ki he Poate kenau tu’utu’uni aofangatuku pea pau ai ke fakahoko ‘a e tu’utu’uni koia he ‘aho ni.
Fakatatau ki he fakamatala ‘oku ma’u ‘e he ongoongo ni na’e fakahoko ‘a e tu’utu’uni ko’eni ‘e he Sea ‘o e Poate Komisoni Fakamafolalea ‘a Tonga Ngalu Fusimalohi ‘o fakafofofonga’i ‘a e Poate kia Nanisē Fififta.
Ko e tu’utu’uni faingata’a foki ‘eni pea na’e pau ke fakahā ai pe ‘e he Sea ‘oku mahino ki he Poate ‘oku ta’efakalao ‘a e tu’utu’uni ko’eni ka kuopau kenau talangofua ki he tu’utu’uni ‘oku ‘omai mei he Potungāue Ngaahi Pisinisi ‘a e Pule’anga pehe ki he Kapineti.
‘Oku mahino ngofua pe foki mo e tu’unga ia ‘e ‘i ai ‘a e kau memipa ‘o e Poate he ‘oku mahino ‘oku nau ‘i he malumalu ‘o e Pule’anga.
Na’e fetu’utaki ‘a e ongoongo ni ki he Fakafofonga Lao ‘a Nanise Fififta Wiliam Clive Edwards pea na’a ne fakahā koe mo’oni ‘eni pehē ki he tu’utu’uni na’e fakahoko ange kia Fififta ‘e he Sea Ngalu Fusimalohi.
Na’e toe fakahā ‘e Edwards ‘e hoko atu ki ha fakatonutonu fakalao he ‘oku mahino ngofua pe na’e ‘i ai ‘a e kupu ‘i he aleapau ngāue ‘a Fifita ki mu’a ‘oku hā mahino pe ai ‘e toe fakafo’ou ‘ene konituleki.
"Ko e nounou taha pe ko hono ‘ave ki he Fakamaau’anga he ‘oku ‘i ai ‘a e keisi malohi ia heni ‘a Fififta pea koe feitu’u totonu pe ia ke aofangatuku mei ai", ko e fakaha ia 'e Edwards..
Na’e fakafisi foki ‘a e Sea kimu'a ‘o e Poate ko’eni Tapu Panuve he ngaahi uike si'i kuo maliu atu makatu’unga ‘i he’ene tali ke fakafo’ou ‘a e Konituleki ‘a Fififta.
