'Ikai tali Lady ‘Eseta Fustu’a totongi huhu’i hono fakamalōlō’i ia ^Featured

Ko Lady ‘Eseta Fusitu’a foki na’e sea ‘i he poate ko’eni ‘a e Pule’anga pe na’e tu’utu’uni ai ke malōlō fakataha mo Lady Tuna Fielakepa ‘e he Minisitā ki he Potungāue ki he Ngaahi Pisinisi ‘a e Pule’anga Poasi Tei ‘i he ta’u 2015.

Na’e ‘eke fakalao foki ‘e Lady Fustu’a ‘i ha fakatonutonu ‘i he Fakamaau’anga Lahi ‘i he ta’u 2016 ‘a hono fakamalōlō’i ia pea tu’utu’uni ai ‘a e Fakamaau’anga Lahi na’e hala ‘a hono fakamalōlō’i ‘a Lady Fusitu’a.

Ko hono faka’ikai’i ko’eni ‘e Lady Fusitu’a ‘a e totongi huhu’i ko’eni ‘oku makatu’unga ‘i he’ene tui na’e totonu ke fakahoko ‘e he Potungāue ki he Ngaahi Pisinisi ‘a e Pule’anga ‘a e tu’utu’uni ‘a e Fakamaau’anga ‘a ia koe Lao ia ‘o e fonua.

'Ikai ngata ai ka 'oku loto 'a Lady Fustu'a ke 'oua 'e 'oatu ha fekau hala ki he kakai 'o e fonua fekau'aki mo e fa'ahinga founga ngāue ta'e fakalao mo ta'e falala'anga ko'eni kuo fakahoko kiate ia.

Ko e totongi huhu’i ko’eni ‘oku fakafuofua ki he pa’anga $40,000 TOP (18,000 USD) ‘o tanaki atu kiai mo e 'ikai ke toe fakafoki ia ki hono lakanga, totongi loea mo e ngaahi totongi kehe pe pehē ki ha kole fakamolemole mei he Pule’anga.

‘Oku tui foki ‘a Lady ‘Eseta Fusitu’a ‘oku totonu ke ‘oua ‘e mo’ulaloa ‘a e lao ‘o e fonua kiha tu’utu’uni ‘a ha ma’u mafai pea ‘oku hoko atu pe ‘a e kumi ‘a Lady Fusitu’a ki he fakamaau totonu ‘o fakatatau ki he tu’utu’uni ‘a e lao ‘o e fonua.