Fakahā 'e he Palēmia 'oku ‘i ai e “Siana Tāmate” ‘oku haea mai ‘e he kau pisinisi Siaina Featured
Minisitā Polisi Mateni Tapueluelu, Palēmia 'Akilisi Pohiva mo e Komisiona Polisi Steven Caldwell lolotonga 'a e fakataha moe kainga Siaina
13 'Epeleli, 2017. Kuo fakahā ‘ e he Palēmia ‘i hano faka’eke’eke ia ‘e he ongoongo ‘a e Kaniva ‘oku ‘i ai ‘a e Siana Tāmate (Hitman) ‘oku haea mai ‘e he kau pisinisi Siaina ke fakahoko e ngaahi ngāue fakamamahi ki honau ngaahi fili Siaina pe ‘i Tonga ni.
Na’e fakahoko foki ‘a e fakataha ‘a e ‘Amipasitoa Siaina mo e kainga Siana ‘i Tonga ni, Minisitā Polisi Mateni Tapueluelu mo e Palēmia ‘Akilisi Pohiva ‘i he faka’osinga ‘o Ma’asi fekau’aki mo e malu ‘a e kau pisnisi mo e kainga Siaina ‘i Tonga ni.
‘I he fakamatala ‘a e Palemia ki he ongoongo ‘a e Kaniva na’a ne pehe na’e ngalo kene ‘ohake ‘a e kaveinga ni ‘i he fakataha ka na’e toki fakahoko ange pe ‘e hono foha ‘i he fono ‘a ia koe Minisitā Polisi Mateni Tapueluelu ‘a e me’a ni ‘i he tuku ‘a e fakataha.
‘Oku fakalilifu kapau koe mo’oni ‘eni pea ‘oku tau sio pe foki ‘i he ngaahi faiva hono haea ‘o ha Siana Tāmate (Hitman) ka ko’eni kapau koe mo’oni ‘a e Palēmia mo e Minisitā Polisi kuo a’u mai ki Tonga ni pea ‘oku totonu ke tokanga lahi ‘a e ma’u mafai he 'oku mahu'inga 'a e malu 'a e fonua pea 'oku fakalilifu.
‘Oku ‘ikai foki ke fakapapau’i mei he Potungāue Polisi ‘a e me’a ni ka ‘oku na’e fakaha pe foki ‘e he Tokoni Komisiona Polisi Pelenatita Vaisuai neongo koe pesesti pe ‘e 3 ‘o e ngaahi hia ‘oku fakahoko 'i Tonga ni 'oku fakahoko ki he kainga ni ka koe ngaahi hia ‘oku mafatukituki mo lalahi.
‘Oku ‘ikai foki koha toki ‘ohake eni ‘e he Palēmia ‘a e kaveinga fekau’aki mo e Siana Tāmate (Hitman) he na’a ne ‘ohake foki ‘eni ‘i he Fale Alea lolotnga 'a e feme'a'aki ‘i he’ene kei Fakafofonga ‘i he ta’u 2013 ‘oku ‘i ai ‘a Siana Tāmate ‘i Tofoa.
