Fakama’ala’ala fekau’aki mo e Tohi ‘a e Palēmia ki Siaina na’e paaki atu ‘e he Nepituno Tonga Online News ^Featured

‘Oku ‘ikai ke ‘uhinga ‘eni ‘oku hala pe loi ‘a ‘ene ongoongo he ko e tohi ‘eni na’e ma’u mei he ma’u'angaa fakamatala faka-‘ofisiale mo falala’anga pea ‘oku mau tauhi ‘a e tatau ‘o e tohi ko’eni.

‘Oku makatu’unga hono tukuhifo ‘o e ongoongo ni ‘i he kole mei he ngaahi kupu fekau’aki ‘oku ‘i ai ‘a ‘enau hu’unga mo fekau’aki tonu mo e tohi ko’eni pea ‘oku faka’apa’apa’i foki ‘eni ‘e he ongoongo ni 'a e ngaahi kole ko'eni. ‘Oku kau ai heni ‘a e mahu’inga hotau vā faka-tipilometika mo Siaina mo ‘enau misiona ‘i Tonga ni pehe ki he’etau fengaue’aki mo e taimi pelepelengesi ‘oku lolotonga fakahoko ai ‘a e ngaue ‘a e Fale Alea ki he fili fakahā loto ke fakahifo ‘a e Palemia.

‘Oku fie fakahā heni ‘e he ongoongo ni ‘e tau’ataina ‘a e ngāue mafatukituki ko’eni kapau ‘e to’o ‘a e tohi ko’eni ka ‘oku mole ke mama’o ke pehe ‘oku ‘ikai mo’oni ‘a e ongoongo na’e fakahoko atu he na’e fakafou ‘i he founga anga maheni kuo mau toutou fakahoko atu.

Kuo ma’u ‘e he Nepituno ‘a e tatau ‘o e Ongoongo Tukuatu ‘a e ‘Ofisi ‘o e Palēmia ‘o e ‘aho 20 ‘o Fepueli 2017 ‘o faka’ikai’i mamafa ‘e he Palēmia ‘a e tohi ko’eni. 'Oku fai e faka'apa'apa ki heni ka ‘oku ‘ikai koha me’a fo’ou ‘a hono toutou faka’ikai’i ‘o e ngaahi tukuaki’i ‘oku fakahoko fakahangatonu ki he ‘Eiki Palēmia.

Kuo mahino foki kuo ‘osi lele ‘a e tohi ni he ngaahi mitia kehe pea ‘oku mahino mo e hu’unga na’e ‘alu atu mei ai. ‘E kei hokohoko atu pe hono paaki atu ‘e he ongoongo ni ‘a e ngaahi ongoongo fekau’aki mo e tohi ni ‘amui ange.

‘I he taimi tatau ‘oku fai hono faka’apa’apa’ia ‘o e ngaahi kupu na’a nau kole mai ki he ongoongo ni ke tukuhifo makatu’unga he ngaahi ‘uhinga ‘oku hā atu ‘i ‘olunga.

Faka’apa’apa Atu

Nepituno Tonga Online News