Mo'oni nai foaki Laiseni Kasino 'a e Kapineti? ^Featured

Ko hono fakaha foki ‘eni ‘e Dr. Ronald D. Pate ‘ai a ko e CEO ‘eni ‘a e Kautaha ni pea na’a ne fakaha foki koe fuofua laiseni natula pehe ni ‘eni kuo foaki ‘e he Pule’anga Tonga ‘a ia ‘oku ne katoi ‘a e katoa ‘o e ngaahi kalasi ‘o e kemipolo pe va’inga monu’ia ‘a ia koe Kalasi I, II & III.

‘I he hoko atu ‘a e fakamatala ‘a Dr. Pate ‘i hono lipooti ‘e he ongoongo ‘a e Yahoo Finance ko e laiseni ko’eni na’e foaki ia ‘i he Tu’utu’uni Fika 1194 ‘a e Kapineti ‘a e Pule’anga Tonga ‘i he ‘aho 4 ‘o Novema 2016 pea moe tohi mei he ‘Eiki Minisita Pa’anga Hu Mai mo e Kasitomu ‘a e Pule’anga Tonga ‘i he ‘aho 24 ‘o Novema 2016 pea na’e fakakakato ‘a e Aleapau Laiseni ko’eni ‘i he ‘aho 9 ‘o Sanuali 2017.

‘I he fakamatala ‘a Dr. Pate ‘oku lolotonga fakakakato ‘a e ngaue ‘enau Kautaha ki he ngaahi pisinisi natula tatau hange koe ngaahi hotele, kasino moe ngaahi pisinisi fekau’aki ‘oku nau lolotonga fakahoko ‘i he Kalipiane, Pasifiki, ‘Esia, ‘Afilika mo e Meteleniane.

‘Oku faka’ikai’i foki ‘eni mei he Pule’anga pea na’e fakaha ‘e he Minisita Pa’anga Hu Mai mo e Kasitomu ‘a e Pule’anga Tonga Hon. Tevita Lavemaau ki he ongoongo ‘a e Letio Tonga ‘o e ‘aho 24 Sanuali ‘oku ‘ikai ke mo’oni ‘eni he ‘oku ‘ikai fakalao pea kuo pau ke liliu ‘a e lao kapau na’e tali ‘eni ‘e he Kapineti.

‘I he fakamatala ‘a e Minisita na’e tali pe ‘e he Kapineti ia ‘a e kole ki he poloseki fakalakalaka ‘o kau ai ‘a e langa hotele ‘i Tongatapu mo Vava’u ka ‘oku ‘ikai koha kasino ‘o hange koe ogoongo ‘a e Red Warrior Entertainment.

Kuo ma’u foki ‘e he ongoongo ni ia ‘a e tatau ‘o e Tu’utu’uni Kapineti Fika 1194 ‘o e ‘aho 4 ‘o Novema 2016 ‘o mahino mei ai na’e ‘ikai fakangofua ‘e he Kapineti ia ha langa kasino ka ko hono tali pe mo poupou’i ‘e he Kapineti ke fakakaukau’i ‘a e Poloseki Faka-Takimamata ‘a e Tavake Tamafua (Tavake Tamafau Tourism Investment Project) pea ke ngaue kiai ‘a e komiti fili ‘a e Kapineti pea ke lipooti ki he Kapineti.

‘I he taimi tatau ‘oku ‘ikai ke ma’u ‘e he ongoongo ni ia ha tatau ‘o ha tohi mei he Minisita Pa’anga Hu Mai mo e Kasitomu ‘a e Pule’anga Tonga ‘i he ‘aho 24 ‘o Novema 2016 ‘oku ‘uhinga kiai ‘a e ongoongo ‘a e Red Warrior Entertainment pehe ki he Aleapau Laiseni ko’eni ‘i he ‘aho 9 ‘o Sanuali 2017.

Kapau 'oku mo'oni 'a e taukave 'a  Dr. Pate mo e Kautaha Red Warrior Entertainment kuo 'osi fakamo'oni ha aleapau he 'a 9 'o Sanuali 2017 pea 'oku mahino leva 'oku ta'e fakalao 'eni he 'oku te'eki ke liliu 'a e lao 'o e fonua ke fakangofua hano foaki ha laiseni kasino.

Ko e me’a pe ‘oku mahino ia ‘oku ‘ikai ke ‘i ai ha Lao ‘i he fonua ‘oku ne fakangofua ha langa kasino pe koe ngaahi fale va’inga monu’ia. ‘I he taimi tatau ‘oku fakafepaki’i lahi foki ‘eni ia ‘e he ma’u mafai pehe ki he tukufakaholo mo e tui faka-Kalisitiane ‘a e fonua.