Fakatotolo’i Potungāue Polisi ngāue kākā ongo Lavulavu mo e ‘Unuaki ‘o Tonga Featured
Ongo Talekita 'o e 'Unuaki 'o Tonga 'Etuate mo 'Akosita Lavulavu
14 Tisema, 2016. Kuo fakahā ‘e he Minisitā Polisi Pohiva Tui’onetoa ki he ngaahi Kautaha Ongoongo kuo kamata ngāue atu ‘a e Potungāue Polisi ki hono fakatotolo’i ‘a e ngāue kākā ‘a ‘Akosita mo ‘Etuate Lavulavu ‘o ma’u ai ‘a e pa’anga tokoni ‘a e pule’anga ki he ‘Apiako ‘Unuaki ‘o Tonga.
Ko e fakahā ‘eni ‘e he Minisitā Polisi hili ia hono tukumai ‘a e lipooti ‘a e Potungāue ‘Atita ‘o fakamahino ‘a e ngāue kākā ‘a e ongo me’a ni ‘o tupu ai ‘a ‘ena ma’u ‘a e pa’anga ‘oku ‘ova hake he vaheua miliona ($553,800) ka koe pa’anga tukuhau ‘a e kakai ‘o e fonua.
Kuo fakahā mei he taha ‘o e kau ngāue tutuku ‘a e ‘Apiako ‘Unuaki ‘o Tonga ka ‘oku ‘ikai loto ke fakahā hono hingoa kuo a’u ange ‘a e kau Polisi ‘o faka’eke’eke kinautolu pea ‘oku ‘ikai kenau toe kalo kae tala ‘a e mo’oni kakato.
Kuo toe a’utonu mai moe taha ‘o e kau faiva ‘i he folosou ‘a e ‘Unuaki ‘o Tonga ‘o fakamatala ‘ene fie fakamo’oni ki he ngaahi fakatotolo ‘oku fakahoko he ‘oku mo’oni ‘a e lipooti ‘a e ‘Atita pea koia na’e kau he kau faiva na’e lesisita ia 'oku ako hili koia koe tau'olunga pe ia mo fei'umu pea na'e 'ikai kau ia he ako.
‘Oku kau ‘eni he nga’unu lelei ‘a e Potungāue Polisi pea taki mai ai ‘e he Komisiona Polisi he koia ‘oku ‘i ai ‘a e mafai ko’eni pea ‘oku mahino pe he na’e ‘ave ‘a e tatau kiate ia ‘e he Potungāue ‘Atita.
‘Oku ne toe fakamahino mai foki ‘a e mahu’inga ke fili tau’atāina ‘a e Komisiona Polisi hange koe founga lolotonga ka e malava e ngaahi ngāue pehe ni neongo ‘a e fakafepaki kiai ‘a e Palēmia.
‘Oku tukuaki’i foki ‘e ‘Etuate Lavulavu ko Dr. Viliami Uasike Latu na’a ne teke ke fakahoko ‘a e lipooti ko’eni ‘a e ‘Atita pea na'e fakatupu 'i he'ene fakalotokovi. ‘I he taimi tatau kuo fakahā mei he Potungāue ‘Atita ko ‘enau ngāue anga maheni pe ia ‘o fakatatau mo ‘enau tu’utu’uni ngāue ke fakahoko hono ‘atita’i ‘a e pa’anga ‘a e fonua ke malu pea ke 'oua 'e ngauehala'aki.
“‘Oku ‘ikai koha ‘Atita ‘a Dr. Viliami Latu pea ‘oku ‘ikai ha’ane kaunga ki he ngāue ‘a e Potungāue ‘Atita he ko e Potungāue tau’ataina pea 'oku fakatamaiki 'a e fakahinga tu'uaki'i pehe ni” koe fakamatala ia mei taha 'o e kau 'ofisa 'a e Potungāue ‘Atita.
Kai kehe ‘oku mahino ‘a e faingata’a ke ‘ufi’ufi ‘a e ngāue kākā ko’eni hange koia kuo lipooti ‘e he ‘Atita neongo ‘a e ngaahi tali mei he ongo matu’a Lavulavu mo e taufaa takai holo hange koe fonuga maheni 'oku na toutou ngaue'aki.
Kuo mahino ko e konga ‘o e fu’u pa’anga ko’eni na’e fakahoko ‘aki ‘a e kemipeini fili Fale Alea ki he fili ‘o e 2014 ‘a ia na’e ikuna ai ‘a ‘Etuate Lavulavu.
‘Oku mahino ko e fakatotolo ko’eni ‘a e kau Polisi pea ke tukuatu leva ki he Fakamaau’anga.
