'Ikai loto nai Palēmia ke fakahoko mai ki Tonga ni Sipoti Pasifiki? Featured
Timi Tonga 'i he Sipoti 'Olimipiki Lonitoni 2012
13 'Okatopa, 2016. ‘Oku mamalie atu pe ‘a e lalaka ‘a e taimi mo e mahino mai ‘a e matamata ‘oku ‘ikai loto ‘a e Palēmia 'Akilisi Pohiva ia ke fakahoko mai ‘a e Sipoti Pasifiki Tonga ki Tonga ni ‘i he 2019.
Kuo tā tu’o lahi ‘a e toutou tohi ‘a e Palēmia kia Lord Sevele ‘a ia ko e Sea ‘o e Komiti Fokotu’utu’u ‘o e Sipoti ‘o fekau’i ke fakafisi. Na’e iku ‘o fakahoko mo e fakatonutonu fakalao pea fakamahino mei he Fakamaau’anga ‘oku hala ‘a e Palēmia pea ‘oku mahinio ‘e totongi ‘a e fakamole koia ‘e he pa’anga tukuhau ‘a e kakai ‘o e Fonua.
Kuo toe mahino foki ‘a e fakafe’atungia’i ‘e he Palēmia ‘a e ngāue ‘a e Komiti ‘a Sevele pea iku leva ki he tautoloi ‘a e ngāue pea fakahoko mo e fetuhu’aki kae tu’u tailiili ‘a e fonua telia na’a ‘ikai lava ‘a e sipoti kae mole ‘a e faingmalie ‘o e Fonua.
Na’e me’a foki ‘a e Palēmia lolotonga ‘a e feme’a’aki ‘a e Fale Alea ‘o Tonga ‘o fakahā ‘e ‘ikai lava ha mala’e tapulu luo ‘e 18 ki he sipoti he ‘e tomui hano langa ‘eni he ‘e fakahoko ia he ta’u ‘e 4 ka ‘oku toe pe ta’u ‘e 2 pea fakahoko ‘a e sipoti.
Na’a ne toe fakahā foki ‘oku makatu’unga ‘eni koe ‘ikai ma’u ha kelekele. Kuo mahino foki na’e fakahoko mei he ‘Ofisi Palasi ke fai ha vakai ki Kauvai ka e tu’u atu e Palemia ia ‘o teke ‘a Tufumahina.
‘I ha fakamatala ‘a Lord Sevele ki he ngaahi mitia na’a ne pehe ai ‘oku lava lelei pe ‘a e fe’auhi tapulu ia he mala’e tapulu lolotonga ‘i Manamo’ui ‘a ia ‘oku luo 9 pea na’e ‘osi fai pe ‘a e femahino’aki kiai.
Na’e toe fakahā foki ‘e Lord Sevele na’e ‘osi felotoi ‘a e kau ‘ofisiale ke fakahoko mo hono fakalelei mo langa ‘o Teufaiva ‘i Ma’asi ‘o e ta’u ni kae ‘ikai fakahoko ‘e he Palēmia ia ha ngaue kiai.
‘Oku mahino ki he tokolahi ‘o e kau fanongo Fale Alea ‘oku taumu’a ‘a e Palēmia ke tukuaki’i ‘a e Hou’eiki Nōpele mo e Tu’i ki he ‘ikai ma’u ha kelekele ka ‘i he taimi tatau ‘oku ‘ikai kene tali ‘e ia ‘a e kelekele ‘oku ‘oatu foaki ke fakahoko kiai ha ngaue.
Ko e tukutuku’au mai ko’eni ‘oku mahino lelei ‘a e vilita’e’unua ‘a e Palēmia ke tu’u ‘ene fakakaukau kae tuku tafa’aki ‘a e sipoti mo e faingamalie ki he fonua mo hono kakai.
