Tala Kei Kapa: Fakatokanga mei he Autorec Enterprises Limited fekau’aki mo e Super Cheap Tonga Featured
Palesiteni 'o e Autorec Enterprises Limited & Filimone To'aho 'o e Super Cheap Tonga
21 Sepitema, 2016. Kuo ma’u ha fetu’utaki fakahangatonu mai mei he Kautaha uta me’alele ‘iloa ‘i Tonga ni mo mamani ko e Autorec Enterprises Limited ‘o fakahā ‘enau ta’efiemalie ki he tu’unga na’e ‘i ai ‘enau fengāue’aki mo e aleapau mo e Kautaha Super Cheap Tonga ‘a ia ‘oku Talekita Pule ai ‘a Filimone To’aho ‘o Tokomololo.
Ko e kautaha ni foki (Autorec Enterprises Limited) ‘oku ‘ikai puli ki he kakai ‘o e fonua ‘enau fetuku mai ‘a e ngaahi me’alele mei Siapani ki he fonua ni mo e tapa kehekehe ‘o mamani. ‘Ikai ngata ai ka ko e kau taki ‘o e Kautaha ni ko e kau Kalisitiane pea ‘oku ‘i ai ‘enau ongo maheke ki Tonga ni ‘i he’enau tui ko e fonua lotu pea ‘oku fiema’u ke langa ha vā fengāue’aki mo tokoni ki hono kakai.
‘I he tohi fakahangatonu mei he Kautaha mo ‘enau faka’amu ke fakaa’u ki he kakai ‘o e fonua ‘a e mole ‘enau falala mo ‘enau ‘amanaki ‘i he ngāue ‘a e Kautaha Super Cheap Tonga pea ‘ao’aofia ai ‘a e taumu’a tokoni mo pisinisi na’a nau ‘amanaki kiai ki he fonua.
‘Oku tui ta’e toeveiveiua ‘a e Kautaha ni ‘oku tototnu ke fakaa’u ki he kakai ‘o e fonua kenau tokanga he ‘oku ‘ikai ke falala’anga ‘a e Kautaha Super Cheap Tonga pea ‘oku totonu mo taau ke malu’i e kakai ‘o e fonua mei he fa’ahinga ta’efakaka’atu’i, ‘ikai falala’anga mo e faihala ‘a e Kautaha Super Cheap.
‘I he fakamatala ‘a e Kautaha Autorec Enterprises Limited kuo ‘osi fakahoko ‘a e fakatonutonu fakalao ‘a ‘enau Kautaha mo e Super Cheap Tonga ‘a Filimone To’aho ‘i he Fakamaau’anga Lahi ‘i Tonga ni ‘i he ta’u ni 2016 pea na’e ikuna ‘a e Autorec Enterprises Limited ka ‘oku a’u ki he ‘aho ni ‘oku te’eki ke totongi ange ‘a e mo’ua ‘o e Super Cheap Tonga ‘a ia ‘oku fakafuofua ki he 70,000 TOP ‘o hange koe tu’utu’uni ‘a e Fakamaau’anga.
Ko e aleapau foki na’e fakahoko ‘e he Super Cheap mo e Autorec Enterprises Limited ‘o fekau’aki mo e ngaahi me’alele ‘a e Autorec Enterprises Limited na’e hū mai ‘e he Super Cheap Tonga ‘o fakatau atu ‘i Tonga ni pea talu mei ai ‘oku te’eki ke totongi ange ‘a e pa’anga ko’eni.
“’Oku mau loto pe ke ‘ilo ‘a e kakai Tonga ki he me’a ko’eni mo hono pa’usi’i ‘emau falala ‘e he Kautaha Super Cheap Tonga pea ‘oku mau loto ke fai ha fakatokanga heni ki he kakai ‘o e fonua pea malu’i kinautolu”, koe fakahā ia ‘i ha tohi mei he Kautaha (Autorec Autorec Enterprises Limited) ‘i hono liliu mei he lea faka-Pilitānia ki he lea faka-Tonga.
Na’e toe fakamatala foki ‘a e tohi ni ki he ngaahi palōmesi na’e fakahoko ange ‘e he Talēkita ‘o e Kuataha ni (Super Cheap Tonga) Filimone To’aho ‘a ia na’a nau pehe ko e mo’oni pea nau falala kiai ka ta koaa koe koto loi mo faka’amanaki.
‘Oku pehe ‘a e na’ina’i ‘a e Kautaha Autorec Enterprises Limited mei Siapani ki he kakai Tonga mo ‘enau ‘amanaki ‘e ‘ikai ke toe fou ‘a e kakai Tonga he hala na’a nau fou ai ‘o iku tonoa ‘enau ‘amanaki.
‘Oku hokohoko atu pe ‘a e feinga ke totongi fakafoki ange ‘a e mo’ua ‘o e Super Cheap Tonga kiate kinautolu fakatatau ki he fakamatala ‘a e Autorec Autorec Enterprises Limited.
