Fakatau $4.50 ki he Lita 'e he Fakafofonga Vava’u 16 Penisini ‘i Vava’u ^Featured

19 Sepitema, 2016

'Etita,

‘Oku ‘i ai ‘a e talanga lahi ‘i he mitia faka-sosiale ‘o tautautefito ki he Facebook fekau’aki mo hono fakatau atu ‘o $4.50 ki he lita a e penisini ‘e he Fakafofonga Fale Alea Vava’u 16 ‘Akosita Lavulavu mo hono hoa ‘Etuate Lavulavu. ‘Oku fakatau atu foki ‘e he ngaahi pausa ‘i Vava’u ‘o $2.99 kihe lita ‘a e penisini lolotonga ‘a e honge ko ‘eni ka e $4.50 ‘a e penisini ia ‘a e Fakafofonga ‘oku ne tu’uaki e ‘ofa ki he kakai masiva.

Na’e fanongonongo foki he letio 87.5 ‘e ‘Etuate Lavulavu ‘i he ‘amanaki ke folau ‘a e MV Niuvakai ‘i he uike kuo maliu atu ‘a e tokoni ‘a e Fakafofonga ke uta mai ‘a e ngaahi talamu penisini ki Vava’u telia ‘a e si’i fiema’u ‘a e kakai masiva ‘o e fonua.

Na'a mau fiefia 'i he fakakaukau 'e si'i 'omai pe 'o fakatau atu 'i he totongi nomolo ka na'e mei tu'u e ta homau mafu hono talami 'oku $4.50 ki he lita pea pa'anga 'e $90 'a e lita e 20. 

'Oku mau fehu’ia lahi ‘a hono fakatau mamafa ko’eni ‘o e penisini pea na’e tali pe foki kiai ‘a e Fakafofonga ‘Akosita Lavulavu. Koe konga ‘eni ‘a e tali ‘a e Fakafofonga na’e fakahoko ‘i he taha ‘o e ngaahi peesi ‘i he facebook (Vava'u Politics) 'a ia 'oku mau toe fakame'apango'ia he ta'e toka'i mo e mio'i.

Sai koe issue ia ko 'eni 'oku tukuaki'i au kiai 'oku 'ikai ko ha issue ia ketau fu'u mole taimi ai ko e 'uhi he kuo pau pe ke ki'i mamafa ange ia he totongi normal 'a e ngaahi pausa mei he vaka lolo 'o hange koia na'a ku 'osi lave atu kiai. Neongo 'ene lahi ange e fakamole ka ko e me'a 'oku ou mahu'inga'ia ai au koe lava ke fakaheka 'o a'u mai ki Vava'u ni e me'a 'oku faka'ofa e kakai he tali houa valu he ngaahi pausa kiai ke ma'u ha'anau mei penisini. 'Oku ou loto pe keu fakamahino atu 'oku 'ikai ha tupu ia 'e taha 'e hilifaki atu he penisini 'o hange koe pehe he ni'ihi kou charge atu 'eau 'eku tupu $2 ki he lita, 'ikai mole ke mama'o, koe koloa pe ke lava 'o recover e fakamole ke toe 'omai 'aki ha penisini kae 'oua leva ke a'u ki he 'aho 25 Sepitema ni kae toki solova ai hotau palopalema ha tu'uta mai e vakalolo mei Nu'usila.

Na’e lahi ‘a e fiefia ko hono fakaha mo tala faka letio ko e penisini ko e fetuku mai ‘e he Fakafofonga ke tokoni ki he kakai masiva pea hili koia ‘oku mamafa ange ia he penisini tatau pe na’e fetuku mai ‘e he ngaahi pausa. 'Oku 'i fe leva heni 'a e tokoni 'emau Fakafofonga?

'Oku ongo lahi 'eni kiate kimautolu he na'e 'i ai e 'amanaki koe tokoni 'eni ka ta koaa koe kumi tu'umalie ia 'iate kimautolu si'i kakai masiva. 'Oku 'ikai to kehe ha taha ia.

Faka'apa'apa Atu,

Loto Vava'u