Ko e ha kuo futefute ai e Pule'anga he teu Fili Fakahaloto? ^Featured

Tangata’eiki,

Kou tui ‘oku lahi ‘a e ma’u hala pea moe takihala’i ‘o e kakai he kaveinga ni. ‘Uluaki ko e me’angaue pe eni ia ‘a e Temokalati ‘a ia ‘oku faka-lao pea faka-Konisitutone. Koe taimi ne fai ai ‘e ‘Akilisi Pohiva ‘a e ‘eke’i 'o e falala’anga ‘o e pule’anga ‘o Tu’ivakano ne ‘ikai fai ha laaulea ki ai hange ‘oku hoko he taimi ni.

Ne ki’i fakapatū ’a Lord Vaea ‘i Nu’usila pea hange ha tu’unga lō kuo veuki ‘enau nga’uta. Kuo ‘ikai ifo ‘enau nofo pea kuo a’u ki hono toutou fehu’i 'i Fale Alea pe ‘e fakahoko fakaku ‘a e Vote of No Confidence. Iku toe kole ke toloi e Fale Ale ka nau folau pea nau toki foki mai 'a e Kapineti.

Toe tu’u mai e Palemia ‘o fai hono fo’i faka’eke’eke ‘o ne vikia pe ‘e ia hono pule’anga. ‘Oku ‘i ai foki ‘etau paloveape ki hono “Vikia ‘o..kae…pongipongi” toki faka’osi atu.

Ne fai ‘e ‘Akilisi mo ‘ene kau poupu he ‘osi e ‘ulauki mahina ‘e 18 ‘a Tu’ivakano mo hono pule’anga ‘enau VoNC (Vote of No Confidence). Ne ‘ikai ke toe ha me’a hono ‘ohake ai, ne iku ‘ikai tali. Ne ‘ikai nonga ai ‘a ‘Akilisi pea ne ‘ave ai e Palemia ‘o e ‘aho koia ki he Fakamaau’anga.

Ko e me’a ‘oku ha mai he taimi ni ‘oku lahilahi e ngaahi me’a ke fai’aki hono vakai’i hono falala’anga ‘o e Palemia. Fili hono foha, palopalema he potungaue ako, Forbes, Tonga Forest, koe minisita ena kuo fanofano mai ia ‘e ‘ikai te ne tautea kae tuku pe kene fakafisi neongo kuo ‘osi mahino ne fai e ki’i inuinu hoko moe ki’i tolo ipu sio’ata.

Kaekehe ‘oku ‘ikai ‘uhinga hono ‘ohake ‘e Lord Vaea ‘a e fokotu’u VONC ke tukuaki’i ai e Hou'eiki Nopele pehe ko e fie Palemia. ‘Ikai koe me’asivi pe ‘oku foaki ange ‘e he Konisitutone pea ‘oku loto ai e Hou’eiki Nopele moe ni’ihi ke vakai’i ‘a e Palemia pe ‘oku kei taau ke hoko atu.

'Oku muimui atu ai moe fehu'i pe koe ha ku futefute 'aka'aka pehe ai 'a e Pule'anga hange ha leka vale he teuteu fili fakahaloto?.

Malo,
Hala Tahi